Kum 1992 nipui kha Denmark-in world champion Germany hnehin an champion

Sweden-a inelna neih ṭum hian Denmark hi an tling zo lo a, amaherawhchu qualifying round-a an tluk loh FR Yugoslavia chu 'Yugoslav Indona' vangin hrem an ni a. Richard Moller Nielsen hote tan beiseina siamsak an ni a, an player zinga thiam ber Michael Laudrup tel loin European champion an ni zui bawk.

Denmark hi coach Richard Moller Nielsen vang liau liauin European champion an ni a, amaherawhchu Danish coach hian a phu tawk chawimawina a dawng pha lo. Sepp Piontek hnuaiah Denmark chu a vawi khat nan kum 1986 khan FIFA World Cup khel turin an tling a, an game nung ṭha tak avangin 'Danish Dynamite' tih an ni.

Piontek hnuaiah hian Denmark-in game mawi tak an khel a, nomawi erawh an chawi lo. Denmark team khelh danin fak hlawh mah se 1990 World Cup khel tura an tlin loh avangin Piontek a bang. Media lamin 1987 aṭanga Piontek hnuaia assistant coach hna chelhtu Nielsen an sawi ri a, Danish Football Union hmaah interview thlengin nei mah se an duh ber a ni lo.

Nielsen chuan, "Foreigner an duh," tiin lungawi lo takin interview a neih zawhah a sawi. DBU hian German coach Horst Wohlers  chu an ram enkawl turin an thlang a, Denmark hian inremna an neihpui tawh thu thlengin an puang. DBU chairman Hans Bjerg-Pedersen chuan, "Richard Nielsen-a hlawhtlinna neih theih hi chu ka pi pawhin a nei thei ang," tiin tham lo takin a sawi.

DBU hian Wohlers hi tlangzarh hman mah se Denmark hian a club enkawl mek German club Bayer Uerdingen nen inremna an nei lo. Germany-a kir turin Wohlers hi koh let a ni a, Denmark-in coach zawn chhunzawmin hming pariat chhawp sa zingah Nielsen chu a tawpna ber a ni cheu. Amaherawhchu Wohlers lakluh an tumna kawnga buaina awm avangin coach dang pasarihin an hnawl a, Nielsen a vanneih phah - a hna hmasa ber chu Euro 1992 qualifying round a ni.

Denmark thuneitu lamin Nielsen hi an duh ber a ni lo a, player lam ngaihdan a danglam lo. Michael Laudrup bakah senior player dang Preben Elkjaer te pawhin DBU hnenah la lut lo turin thu an thlen hial. Peter Schmeichel leh Brian Laudrup te chuan tawnhriat nei ṭha an duh a, assistant coach lakah an rilru a hmin lo.

Total football chawinungtu zinga mi Johan Cryuff chuan, "Game mawi tak khelh a, result tel lo chu awmzia a awm lo. Chutiang bawkin game mawi tel lo a, result ṭha neih ringawt chu an ning ṭhin," tiin a sawi. Nielsen hi Cyruff-a thusawi hmasa zawkah hian a rilru a dam thlap a, thusawi pahnihna erawh a a uk sak lo.

Nielsen hnuaia an match hmasa berah Denmark hian Wembley Stadium-ah England an hmachhawn a, goal venhim an thupui nghal.  Second half-ah an thiampuipa Michael Laudrup chu defender Morten Bruun hmangin a thlak a, Denmark hi 1-0 in an chak lo. Danish Dynamite an tih ṭhin hun a liam a, an khelh dana lawm awmchhun chu Nielsen chiah a awm. Denmark senior player-te'n Nielsen an duh loh chhan a lang nghal a, training leh team boruak pawh a danglam ta vek.

Euro qualifying match hmasa berah Faroe Islands 4-1 in an sawp a, Michael Laudrup pawhin goal hnih a khung. Amaherawhchu match hnihnaah Northern Ireland nen 1-1 in an inhnehtawk a, group khat aṭanga pakhat chiah tling tur a nih avangin an elpui ber Yugoslavia an hneh ngei a ṭul. 

Nielsen-a'n a tuang tichhahin striker pakhat chiah a hmang a, an khawtualah Yugoslavia lakah 2-0 in an chak lo. Entu mipuiin an coach hlui hming lamin 'Piontek!, Piontek!' tiin a au rual a, an thil beisei chu thleng thei a ni tawh lo. Denmark hmabak a thim a, player lungawi loin hmabak a ti harsa sawt.

Hetih hunlaia kum 27 mi lek Jan Molby chuan Liverpool tan a vanglai hmang chho mek mah se ram tana khelh a chawlhsan a, Laudrup te unauin an zui. Michael Laudrup chuan, "Football nuam ti taka ka khelh ṭhin kha ka thei tawh lo a, ṭangkaina ka nei thei tawh lo. Ka chawlh ve mai a ṭul a ni," tiin ram tana inkhelh a chawlhsan thu a puang. Qualifying round match thum lekah star player pathum an chan. 

DBU lamin Nielsen chungah rinna an nghat a, ban duhtu tam mah se Denmark coach a ni chhunzawm. Star player tel lo chungin result ṭhain a chhunzawm a, Belgrade-ah Yugoslavia lakah phuba lain 2-1 in hnehna an chang. Nielsen chuan, "Player ṭha berin team ṭha ber an din kher lo," tiin inkhelh banah a sawi ve ngat.

Denmark-in an tlawh hnu kar khatah Yugoslavia ramah tualchhung indona a chhuak. Euro qualifying erawh khelh zawh a ni a, Denmark hian an khingpui hnehzui vek mah se Yugoslavia chu pakhatna an ni ta tho. Amaherawhchu Yugoslavia chu ram pangaah a kehdarh a, tu berin nge khel ang tih hriatthiam a har.

UEFA-in thutlukna an siam hma hian Denmark erawh World Cup 1994 atan an inpuahchah leh tawh a, Brian Laudrup pawhin a thutlukna sutin April 8, 1992-a Turkey nen friendly match an khelh ṭum pawhin a inlan leh tawh - Michael Laudrup erawhin a thutlukna a sut ve lo. Yugoslavia boruak a ṭhat loh zel avangin inelna ṭan hma ni 13 (May 28, 1992) a la awm tihin Denmark chu an ai awh tura tih an ni. 

Denmark-in inpuahchahna hun ṭha an nei lo a,  Sweden, England leh France te nen group khatah awmin inelna tikimtu leka ngaih an ni. Amaherawhchu Denmark hi inpuahchah lo anga mi tam takin an ngaih laiin coach Nielsen erawhin beisei a awm tih hriain a inah inkhung hrangin game plan a duang a, player tam zawk hi Nielsen-a'n youth team-a a enkawl an nih bawk avangin team chhung an inhrechiang viau bawk.

Chutihrualin chawlh hmanna aṭanga koh haw an nih hlawm avangin  Peter Schmeichel chuan a teammate-te chu 'pathau awm khawm' tiin fiamthu nan a hmang. Denmark hi a tikimtua ngaih an ni a, amaherawhchu mipui ngaihdan ang ngawt a ni ta lo. Defensive game khelin England nen goal awm loin an inhnehtawk a, Sweden lakah 1-0 in tlawm mah se Michel Platini kaihhruai France an hneh. Les Bleus-ah hian player ṭha bik Jean-Pierre Papin leh Eric Cantona te an kawl a, he team hneh thei Denmark hi a tikimtu ngawt chu an ni lo.

Semifinal-ah Denmark-in champion lai Netherlands an hmachhawn a, Dutch team hian Ruud Gullit (C), Dennis Bergkamp, Ronald Koeman, Marco van Basten, Frank Rijkaard leh Frank de Boer te kawl mah se Denmark hian Henrik Larsen goal hnih hmangin ṭum hnih hma an hruai. Netherlands-in Bergkamp leh Rijkaard hmangin an sut ve ve. Extra time-ah goal luh belh loin penalty shootout-ah 5-4 in Denmark-in hnehna an chang.

Final-ah 1990 World Cup champion Germany chu chak tura rinkai an ni a, amaherawhch back pass man theih hun lai a nih avangin Thomas Hässler, Stefan Effenberg, Andreas Brehme leh Jürgen Klinsmann te awmna Germany pawh an che thei bik lo. Minute 18-naa John Faxe Jensen goal hmangin Denmark-in hma an hruai a, goal venhim hna thawkin an chance neihchhun an hmang ṭha bawk. Minute 78-naah Kim Vilfort-a'n Denmark tan chak nemnghehna goal a khung a, football history-a 'upset' lian ber zinga sawi a ni.

Hetih hunlai hian Denmark hian khawvela player ṭha ber zinga mi Michael Laudrup an nei a, amaherawhchu Barcelona star Michael-a tel lo hian European champion an ni thei a, an hlawhtlinna hi a ropui hle.

Euro 1992-a Denmark champion puitu Richard Moller Nielsen hi August 19, 1937 khan Funen-a thingtlang khaw pakhat Ejstrup-ah a piang a, lo neitu chhungkua aṭanga seilian a nih avangin thawhrimna hlutna a man thiam a. Football pawh hi a tui lawk lo, London-a 1948 Olympic neih a nih khan football a tui ṭan a, hetihlai hian Nielsen hi kum 11 mi a ni.

Vanduaithlak takin Nielsen te awmna khuaah hian field ṭha a awm lo a, club a awm hek lo. Kum khat hnuah Funen-a club lian ber Odense Boldklub (OB) tana khel turin a tling a, first team tan pawh khel chho zelin he club-ah hian a football career pumpui a hmang. Nielsen hian 1955-1962 chhung chauh Odense Boldklub tan hian a khel a, ram tan pawh vawi hnih khel hman mah se hliam vangin kum 25 mi lek a nihin football khelh a chawlhsan.

Kum 2005 khan Nielsen hi a seilenna Ejstrup-ah a kir a, hemi ṭum hian, "Entu chu an tam thei khawp mai, pawisa erawh kan dawng ngai lo. Ram tana kan khelh ṭum pawhin kan mual Idraetsparken, Copenhagen-ah chuan chhun chaw pai a ngai," tiin a inkhelh hun lai chanchin a sawi. 

Nielsen hunlai hian Denmark hian professional takin inelna an la kalpui lo a, hlawh ṭha an la nei lo. Football khelh a chawlhsan hnu hian coaching career ṭan nghalin kum 1975 khan a club hlui Odense Boldklub-in an ruai a, heta ṭang hian hming a chher ṭan. De Stribede hi kum 10 a enkawl chhungin an ram league-ah vawi hnih a champion pui a, Danish Cup nomawi a chawipui bawk.

Kum 1985 khan Denmark coach Sepp Piontek pui turin Nielsen hi an ruat a, he team hi Denmark team awm tawh zinga ṭha ber ang hiala sawi an ni. Danish Dynamite-ah hian Michael Laudrup, Preben Elkjær, Allan Simonsen, Frank Arnesen, Jan Molby leh John Sivebaek te an tel.

Denmark coach a nih meuh chuan player langsar tam zawk an chawl tawh a, Euro 1992 champion zingah phei chuan Michael Laudrup-a nau Brian leh Manchester United legend Peter Schmeichel tih lo chu hetih hunlaia 'world class'  tia chhal tur an awm lo. Chutichung chuan Nielsen hian Denmark hi Euro 1992-ah a champion pui a, 1995 khan FIFA Confederations Cup-ah a champion pui leh bawk.

Amaherawhchu Denmark hian Nielsen hi a phu tawk chawimawina an pe lo a, Euro 1992 an champion ṭum hian Brondby coach Ebbe Skovdahl hnenah Coach of the Year chawimawina pek a ni daih. Nielsen hnenah erawh  World Soccer Manager Award hlan a ni thung. Europe ramte tana football inelna berah hial Nielsen hian an ram hi champion pui mah se Danish mipui erawhin Piontek hnuaia an ram inkhel nung ṭha tak Danish Dynamite sawi nuam an ti zawk.

Kum 2006 khan Danish Football Hall of Fame tih ṭan a ni a, Michael Laudrup leh 1992 Euro team  chu dah luh hmasak an ni a, Nielsen erawh an hmaih thung. Kum 2009 khan 1980s chhoa Denmark team 'Danish Dynamite' hminglem an pek te chu Hall of Fame-ah hian dah luh an ni a, kum 2011-ah Piontek an dah lut. 

February 13, 2014 khan Nielsen hi a thluaka bawk awm an zai fuh tawk loh avangin a thi a, hemi hnu kar hnihah Danish Football Hall of Fame-ah an dah lut. Nielsen-a fapa Tommy Moller Nielsen-a'n chawimawina a laksak a, hemi ṭuma chhimtute pawh an hraw hle. Denmark team hneh zinga mi France team enkawltu Michel Platini pawh a tel a, UEFA President hlui chuan, "Denmark kha lo hneh ta ilang chuan French club tenau ka enkawl ang a, UEFA President ka ni lo ang," tiin Tommy a hrilh.

Denmark leh Manchester United keeper hlui Peter Schmeichel chuan, "Kan ram pasalṭha dik tak a ni a, kan ram chanchinah a hming a dai tawh dawn lo. European Championship-a kan champion ṭum hi zirlai a ni ang," tiin Nielsen-a Hall of Fame-a an dah luh ṭum hian a sawi.