Bayern an chesual nawn, Leipzig an chak

Bayern Munich-in Champions League quarterfinal first leg-a Paris-Saint Germain an hneh loh hnua an match hmasa berah Union Berlin nen 1-1 in an inhnehtawk. Inrinni liam taa Allianz Arena-a inkhelah hian Jamal Musiala hmangin Bavarians-in goal khung mah se Union Berlin-in minute nga chauh a awm tawh tihin Marcus Ingvartsen hmangin an sut.

Bundesliga inkhel dangah RB Leipzig-in Werder Bremen 4-1 in an sawp a, champion beiseina an la chhi nung ve zel. Hansi Flick-a hote hian point 65 hmuin hmahruaitu an ni a, Leizpig aiin point ngain an hmu tam zawk. Borussia Dortmund pawhin Stuttgart 3-2 in an hneh a, Champions League khelh beiseina an la nei ve bawk.

Bayern kim lo
Bayern Munich-in an elpui RB Leipzig chu April 3 khan khualmualah Leon Goretzka goal hmangin an hneh a, Bundesliga-ah champion lai hian point sarihin hma an hruai. League match sarih khelh tur la awmah Bavarians-in awlsam takin nomawi an chawi turah a ngaih theih a, amaherawhchu rinlawk ang ngawt chu a ni lo.

Bavarians-in inhliam leh damlohna avangin Union Berlin hmachhawn turin player chhawr rim loh lut an tam hle. Goalkeeper-ah Manuel Neuer awm mah se defence-ah Jerome Boateng (23) chauh tun season Bundesliga-a match 20 khel tling a awm. Boateng-a kawppui Javi Martínez-a'n league match 16 khel ve mah se vawi 12 hi bench aṭangin a lut.

Mual sir lama awm Bouna Sarr-a'n league match vawi ruk a khel ta chiah a, kum 21 mi Josip Stanisic-a'n a vawi khat nan Bayern senior team-ah a inlan bawk. Midfield-ah Joshua Kimmich, Thomas Muller leh Kingsley Coman te awm bawk mah se player naupang zawk Jamal Musiala leh Tiago Dantas te an khelh ngai. Tlarhmaah Robert Lewandowski a la inhliam avangin Eric Maxim Choupo-Moting a mal tlat bawk.

Point khat chauh
Allianz Arena-a inkhelah Jamal Musiala-a'n woodwork a pet per a, Union Berlin chance an nei ṭha zawk. Marius Bulter-a'n vengtu nei lo mah se keeper Neuer-a zawnah chauh ball a tauh. First half-ah goal hmuh tur a awm lo.

Union Berlin-in counter attack an hmang ṭangkai a, Max Kruse-a'n a hun ṭha neih goal zawnah a pet lo. Bavarians tan Kingsley Coman thlaktu Leroy Sane-a'n a pet over.

Minute 68-naah Musiala-a'n box chhung buai nuaih karah a thiamna a pholang a, Bayern hmahruaina a khung. Amaherawhchu Bavarians substitute Tanguy Nianzou-a'n inkhel a thlir tui hret a, Union Berlin-in an hrem. Mual vei lam aṭanga Robert Andrich-a cross chu Marcus Ingvartsen-a'n siphurh sut nan a hmang.

Leipzig an chak
Weserstadion-ah mikhual RB Leipzig-in inkhel an thunun a, harsatna nei loin Werder Bremen 4-1 in an sawp. Leipzig tan Dani Olmo-a'n minute 23-naah goal hmahruai a khung a, Alexander Sorloth-a'n goal hnih khung belhin first half-ah 3-0 a ni tawh.

Werder Bremen-in minute 61-naah Milot Rashica penalty hmangin si phurh sut ṭhen mah se Marcel Sabitzer-a'n minute 63-naah Leipzig tan khung belhin 4-1 in hnehna a chang. RB Leipzig hian match 28 aṭangin point 60 an hmu a, match ruk khelh tur la awmah champion lai Bayern point ngain an pha lo.

Engtin zel?
Inkhel dangah Borussia Dortmund-in Stuttgart 3-2 in an hneh hram a, Champions League khelh beiseina an la chhi nung ve zel. Dortmund tan hian Jude Bellingham, Marco Reus leh Ansgar Knauff ten goal khat ṭheuh an khung a, chakna goal hi minute 80-naah an khung chauh.

Borussia Dortmund hian Champions League-ah Nilaini zan hian Manchester City an mikhual dawn. Dortmund hi khualmualah 2-1 an chak lo a, an mualah 1-0 an chak a nih chuan semifinal an lut thei ang.

Bundesliga leh Champions League champion lai Bayern pawhin Thawhlehni zan hian Paris-ah French champion PSG an tlawh dawn a, an mualah 3-2 a an chak loh avangin nomawi humhim turin insiamṭhat an mamawh hle.