Zlatan Ibrahimovic an hnawt chhuak

Inrinni zan Serie A inkhelah Zlatan Ibrahimovic hnawhchhuah a ni a, Swede striker awm lo mah se AC Milan chuan khualmualah Parma 3-1 in an luhchhuah a, point thum an hlawh chhuak.

Milan hian Ante Rebic leh Franck Kessie te goal hmangin chawlhlawk hmain si hnih faiin hma an hruai. Minute 60-naah Ibra hi red card pek a ni a, mualneitu lamin Riccardo Gagliolo hmangin khung ve mah se Milan lamin Rafael Leao hmangin chak an nemnghet.

Ibra hian goal khung lo mah se a thawh hlawk, an goal hmasa ber a siamsak a ni a, an goal hnihna luh nan pawh a thawh hlawk hle. Hnawhchhuah a nih danah a lawm lo, referee Fabio Maresca chuan a thusawi a hresual mai niah a ngai.

Milan coach Stefano Pioli chuan, "Zlatan khan referee nen an inhnial thu min hrilh a, an thusawi kha red card hmuhna tur nia a ngaih loh thu pawh a sawi. Referee khan a thusawi a ngai kawi niin a ngai," tiin a player thusawi a sawi chhawnsak.

Ibra hnawt chhuaktu Maresca hian kumin January thla khan Inter Milan coach Antonio Conte nen pawh buaina an lo nei tawh. Ibra chuan a card hmuh hi khinlet a duh thu a sawi a, a hlawhtling a nih chuan match hnih hrem tur kha match khat atana tih tlem theih a ni ang.

Kum 39 mi Ibra hian Serie A season kal laiah match 17 a khelh aṭangin goal 15 a khung tawh a, club player zingah ani aia khung hnem an awm lo. Milan technical director Paolo Maldini chuan an player hian contract thar a ziak hnai tih a sawi chiang tawh.

Season bul ṭan fuh mah se Milan hi an chesual ta fo a, hmahruaitu Inter Milan an phak lohna chu point riatah sawr zim leh rih mah se an elpui team hian match khatin an khel tlem zawk.