Mbappe hoin PSG chak nuamsa

Paris St-Germain chuan Ligue 1 nomawi an kawl lai chu Lille lakah hloh mai an tum lo. French champion hian Lille an ngam loh hnua an league match khelh lehna hmasa berah Strasbourg chu 4-1 in an sawp.

French champion tan Kylian Mbappe-a'n goal hmahruai a khung bakah Moise Kean khung tur a siamsak a, Pablo Sarabia leh Leandro Paredes ten khung bawkin mualneitu lam tana Dion Moise Sahi goal khungin awmzia a nei phak lo.

PSG hian hnehna chang mah se table chung berah an awm phak lo. Zirtawpni zan khan Lille chuan Metz lakah 2-0 in hnehna an chang a, khelh zat inangah Paris club ai hian point thumin an la sang zawk zel rih a ni.

League match khelh hmabak paruk chiah an nei tawh a, champion lai Mauricio Pochettino naute tan league title humhim tur chuan chetsual a thiang tawh lo, an elpui Lille an chetsual tel a ngai tawh bawk - inelna a la ngaihnawm chho dawn.

Poch-a'n PSG a enkawl hmasak ber season a ni a, atan thil a awlsam vek lo. Champions League lamah erawh Barcelona an hneh hnuin Bayern Munich lakah dinhmun ṭha taka an ding mek a, eng tiangin nge season an hman zawh dawn a la hriat loh.

PSG-in nomawi an chawi theih nan chuan Mbappe a pawimawh zual dawn. Hliam leh neuh neuh dang vangin Neymar a inlan lo ngun a, rawlthar Mbappe chungah mawhphurhna a tla lian zual hle.

France international hian tun season inelna hrang hrangah goal 33 a khung tawh a, league bikah match 27 aṭangin goal 21 a khung tawh. Paris club tan league goal a khung zat belhkhawm hi 85 ni tawhin, a chungah Zlatan Ibrahimovic (113 goals) leh Edinson Cavani (138) te an awm.

PSG manager Poch chuan, "Nomawi inchuh boruak a sang, kan elpui Lille an chak tih hre chunga inkhel ni mah ila buaina kan nei chuang lo. Match khelh hmabak a tam tawh lo a, chuvangin inkhel zawng zawngah point thum hmuh zel a pawimawh," a ti.