Taekwondo inelna an zo fel

Mizoram Amateur Taekwondo Association buatsaih 23rd Mizoram Official (Kyorugi & 14th Poomsae) Taekwondo Championship chu zawh fel a ni a, a pumpuiah Aizawl Taekwondo Academy an champion.

Inelna hi MATA Hall, Republic Vengthlangah neih niin, team champion Aizawl Taekwondo Academy hian point 1365 an hmuh a, an hnuaiah hian Ramhlun Sporting Club (1333 points) an awm.

Point 1304 hmutu Exodus School, Chaltlang chu Best Fighting Spirit Team an ni a, Republic Vengthlang Taekwondo Club chu Most Promising Team an nih bakah Taekwondo Academy of Best chu Best Discipline Team an ni bawk.

Championship-ah hian category hrang hranga gold medalist-te inchuh ṭhin, Mizoram a taekwondo thiam ber nihna inchuhna '2021 Champion of Champions Title' zawnna neih chhunzawm nghal a ni.

Mipa Gold medalist 12 zing aṭangin senior under 74kg cagetory champion Vanlalmawipuia Hnamte chu a vawi hnih nan a chungnung ber a, hmeichhe lamah under 62kg champion Kaplianzawni chuan a vawi thum nan hlawhtlinna a chang bawk.

Club 20 aṭanga player 525 inlan zingah Amosa Lalnunhlua (Mamit DATA) leh Ramdingliani (TABF) te chu 'Official Championship Kyorugi Best Fighter' atan thlan an ni. Poomsae Best Performer-ah Joshua Lalthlangdika (Exodus School) leh Arella Roluahpuii (Gidae Taekwondo Club) thlan an ni bawk.