Liverpool leh Chelsea an chak- top four a 'hot' tual tual

Premier League top four inum boruak a 'hot' chho zel a, season thara Champions League khelh tum Liverpool leh Chelsea-ten Pathianni zan khan an khingpui ve ve an hneh.

Reds-in Anfield mangchhia mangṭhain an mikhual Aston Villa chu 2-1 in an hneh a, Ollie Watkins-a'n Villa tan goal hmahruai khung mah se Liverpool hian Mohamed Salah leh Trent Alexander-Arnold hmanga chhangletin hnehna an chang.

Premier League champion-in an nomawi an humhim dawn lo tih a chian tawh avangin top four chu an tum ber a ni a, Villa an hneh hnu lawk hian top four-ah an inhlangkai.

Mahse, a sang pali zinga Reds awmchhung a rei lo - a hnu lawkah Chelsea chuan Kai Havertz, Christian Pulisic (2 goals) leh Kurt Zouma goal khung hmangin Crystal Palace chu 4-1 in an sawp a, palinaah invawrh chhoin Reds hi panganaah an tla thla.

Anfield a mawi
Liverpool tan an kulhpui ni ṭhin Anfield chu tun hnaiah a nghing a, league match ruk zet a zawnin an tlawm tawh a, vawi riat zet chu an mualah hian a zawnin an chak zo tawh lo - Inrinni zanah erawh thawnthu a danglam ta.

Goal khung hmasa erawh Villa an ni a, an intawn hmasaka 7-2 a Liverpool an sawp ṭuma hattrick siamtu Watkins chuan minute 43-naah goal hmahruai a khung - Alisson tan dan theih niin a lang a, Brazilian keeper hi tun season-ah a 'form' hleithei lo.

Reds-in a hnu lawkah Roberto Firmino hmangin an si phurh an sutah an ngai a, mahse, video assistant referee (VAR) hmanga ennawn a nih hnuah goal luhna kawnga inrawlh Diogo Jota chu a offside niin a lang - referee-in a pawm lo a, a 'tight' takzet.

Jurgen Klopp-a naute an vanduai reng lo - Emiliano Martinez-a'n Andy Robertson-a shot a dan per chu Salah-a'n goal-ah a chantir a, 1-1 a ni.

A tawpah chuan...
Team pahnihin goal dang an khung thei lawk lo a, a zawna a vawi kua nan Anfield-ah Reds an chak zo dawn lo niin a lang - Villa tana Trezeguet-a post pet per chu uiawm tak a ni.

Mahse, hun pek belhah Arnold-a rawn lang. English defender hian Euro 2020-ah ram tana fehchhuah a phu tih pholangin mawi zetin chakna goal-a khung a, a hmuna inkhel entu England coach Gareth Southgate-a'n a hmuh hmaih lo ang.

Liverpool boss Klopp chuan, "Trent hian a thiamzia pholang turin tih leh tur chuang a nei lo. Season duhawm ber pawh a hmang a ni thei a, mahse, national team coach thutlukna chu kan zah tur a ni. Ni 10 chhungin vawi hnih a khel ṭha em em a, a pawimawh ber chu he thil sawi kan bansan hi a ni," a ti.

Klopp chuan inkhel thlirletin, "Hnehna ropui tak a ni a, a hahdamthlak hle. Kan mamawh em em result a ni a, point thum hi kan mamawh takzet a ni," a ti a, Liverpool hian Nilani zanah Champions League quarterfinal second leg khel turin khualmuala 3-1 a an ngam loh hnu Real Madrid an mikhual zui ang.

Chelsea an chak
Liverpool chak thu hre sain Chelsea an inlan a, goal khung an harsat lo hle. Minute riatna lekah Kai Havertz chuan goal hmahruai a khung a, hnih hnuah Pulisic-a goal khung tur a siamsak zui.

Palace an insiamrem hman lo. Minute 30-naah Mason Mount-a freekick aṭanga ball kal chu Kurt Zouma chuan a tauh lut ve leh a, goal dang lut loin chawlhlawk hman a ni.

Minute 63-naah Christian Benteke chuan second half-a insiamṭha Palace tan a khung ve leh a, mahse beiseina a siam zo lo - minute 78-naah Pulisic chuan a khung ve leh a, Palace an tlawm chiang. Havertz-a'n Chelsea a pan hnua match khata assist leh goal-a neih hmasak ber ṭum a tawng a, Blues manager Thomas Tuchel chuan, "Hei aia duhna leh tumna sang zawk a la nei thei a ni," a ti a, German midfielder chungah beiseina a nei sang.