LBS Suzuki Inter Branch YMA Online Chess zo fel

Central YMA leh Mizoram Chess Asso-ciation buatsaih LBS SUZUKI Inter Branch YMA Online Chess Tournament chu April 9-10, 2021 chhung khan tluang takin zawh fel a ni.

Mizoram hmun hrang hranga YMA Branch 76 aṭangin Chess player 330 an inziak lut. Result puan leh lawmman semna hi April 17, Inrinni turin ruahmanna siam ni tawh mah se Covid-19 avanga SOP thar a awm leh tak avangin a hun sawn a ni ang.

Online Chess mahni in lum aṭanga khelh theih a ni a, Covid-19 hrileng karah pawh inelna buatsaih turin harsatna a awm lo. CYMA Chess inelnaah hian Republic Veng Branch YMA tel tam berin mi 17 an tel a, College Veng (11) leh Bawngkawn (10) ten an dawt.

Inelna hi BLITZ GAME (5minutes + 3seconds increment) a khelin, players-te hian swiss league – round/game 12 khelh a ni a, zan khatnaah round/game – 6 zela khelh a ni. Lawmman hi mimal leh team anga sem a ni dawn a, team inelnaah hian branch khat aṭanga ti ṭha mi panga point belh khawm a ni ang.