Tualchhung Cricket A chung berah Chanmarians

Chanmarians chuan Zemabawk Pitchers lakah run 89 zetin hnehna an chang a, tualchhung cricket inelna lian Mahuma Memorial 1st Division Screening Tournament khelh laiah hma an hruai mek.

Inrinni khan Suaka Cricket Ground, Sihhmuiah inelna neih chhunzawm niin, ṭhum vawra vannei zawk Chanmarians lamin vuak hmasak an thlang. Over 46 chhunga run 206 siamin an thi kim.

Zemabawk Pitchers tan target sang tak a ni hran lo. Mahse, Chanmarians ball vawm thiam Nehal Katakadond an ngam lo. Player of the Match atana thlan Katakadond hian wicket li a la, an khingpui hian run 117/10 bak an tlin lo.

League match vawi ruk an khelh tawh chinah Chanmarians hian vawi nga hnehna changin table hmahruaitu an ni. Anmahni ang bawka vawi nga chak Chhinga Veng leh Ramhlun Venglai aiin Net Run Rate an nei ṭha zawk a ni.

Vawiin hian a hmun ngaiah Mahuma Memorial hi khelh chhunzawm a ni ang. Khaled Memorial 2nd Division Screening Tournament chu April 13, Thawhlehni hian Legends leh Hunthar ten final an khel bawk ang.