Mizoram Open champion Innocent

Mizoram Tennis Association hnuaia inelna lian leh ngaihhlut Mizoram Open vawi 34-na chu Inrinni khan khelh zawh a ni a, mipa singles huangah Mizoram number 2 ni lai Innocent Lalrindika chuan Ramengmawia lakah 6-4, 6-1 a hnehna changin a champion.

Aizawl Tennis Club a inelna neihah hian hmeichhe lamah pawh, Mizoram number 2 Sandhya Giri chuan HT Lalengmawii chu 6-4 a hnehin nomawi a chawi ve bawk, Lunglei nula hian player ṭha a nihna a lantir zel.

Mipa doubles lamah chuan Innocent Lalrindika bawk a langsar. Ramhlun Tennis Club player hi Lalthanmawia nena ṭangdunin, an khingpui HT Zathangliana leh Lalrinpuia te inkawp chu 6-2, 6-2 in an hneh bawk a, nomawi an chawi.