Real-in Barca an ngam; nomawi a hnai?

Inrinni zan El Clasico inkhelah Barcelona an tlawm - Real Madrid chuan an hmelma kumhlun hi 2-1 in an hneh a, La Liga table chung ber an luah zui.

Real Madrid tan Karim Benzema leh Toni Kroos-ten goal khat ve ve an khung a, Barcelona tana Oscar Mingueza-a goal khungin a ṭhiante a fuih phur zo lo. Zinedine Zidane-a nauten hnehna an chan avangin league table chung berah an awm a, Barcelona aiin point khatin an sang a, Atletico Madrid nen point 66 ve ve an nei.

Atletico Madrid hian nizan khan Real Betis an lenchilh a, he thu buatsaih lai hian result kan hre hman lo - hnehna an chan chuan Real hi point thumin an tlanpel leh ang.

Messi vs Real
Real Madrid-in inkhelh hmain an captain Sergio Ramos leh Raphael Varane an chhawr thei dawn lo tih a chiang a, khawvela centre back ṭha pahnih tel loa Barca mikhual hi Real tan a zuamawm lo.

Hei mai a ni lo - Barca-in an league match hnuhnung 19-ah tlawm an nei miah lo a, vawi 16 chakin vawi thum draw result an nei. Barca laka point thum hlawhchhuah a harsa dawn tih a chiang. Barcelona-in Lionel Messi an la nei a, Real lamin Cristiano Ronaldo an nei tawh lo thung. Messi-a'n El Classico-a goal a khung zat belhkhawm chu goal 26 a ni a, Real squad pumpuiin Barca laka an khung zat belhkhawm nen a intluk chiah.

Statistics leh thil dang thlir chuan Real tan Barcelona laka chak hi a harsa dawn tih a lang a, khelmualah erawh thawnthu dang hmuhtir kan ni thung.

Benzema-a 'class'
Ronald Koeman-a'n 3-5-2 formation-a rawn hmang a, tlarhmaah Messi, Pedri leh Ousmane Dembélé awmin Catalan club hian Real an nawr na nghal hle.

Mahse, minute 13-naah rin loh zawkin goal an khung a, Lucas Vazquez-a siamsak chu Karim Benzema chuan mawi zetin a kheng goal - goal class bik a ni. Kum 33 mi striker hian a league match hnuhnung pasarih aṭangin goal kua a khung ta a, tun season inelna hrang hrangah match 35 khelin goal 25-a khung tling ta bawk.

Barca an insiamṭha hman lo. Minute 28-naa Kroos-a freekick ṭha tak chuan Sergino Dest-a per hnuah Jordi Alba chuan tauh chhuak zo loin Barca-in an goal hnihna an chhuah.

Barca beiseina
Catalan club-in ball chang tam chungin goal an khung thei lo a, Koeman-a'n formation thlak a ngai tih hriain 4-3-3 in a team a khelhtir - a tisual lo.

Second half minute 15-naah Mingueza chuan si phurh a rawn sut ṭhen a, kum 21 mi centre back hian Jordi Alba-a siamsak chu Barca phurna siam turin a pet lut. Mahse, Madrid khawpuia ruah sur hnuaiah Barca-in goal dang an khung thei chuang lo. Real midfielder Casemiro-a'n Mingueza a tih tluk avangin minute 90-naah a yellow card pahnihna a hmu a, hnawhchhuah a ni.

Player kim loa Real an khelh hnuah Barca tan kum 18 mi Ilaix Moriba chun hun pek belhah crossbar a rawn tih per a, Catalan club an vannei tawk lo.

Penalty & VAR
Barcelona-in hun tawp lamah penalty hmuh an beisei a, Ferland Mendy-a'n Martin Braithwaite-a tih tluk avanga penalty hmuh an inbeiseina hi referee-in a ṭawmpui lo thung.

Koeman chuan, "Penalty kan hmu ngei ngei turah ka ngai a, engvanga VAR hmanga ennawn ni lo nge ka hrethiam lo," tiin a lungawi lo hle - Barca tan Messi chuan corner aṭangin uiawm takin woodwork a tih per bawk.

Dutch coach chuan referee sawisel chhunzawmin,"Hun pek belh pawh kha minute li lek a ni a, a tlem mah mah - referee-in a headset chhia a buaipui chhung pawh kha a rei a, kha vang ringawt pawh khan minute li aia tam chu pek belh tur a ni," a ti a, Zidane erawhin, "Referee-in a ham lo a nih chuan penalty a ni lo tihna a ni mai a, extra time chu a duh zat minute a pe thei a ni," tiin referee-a chhan thung.

Barcelona hian 69% ball chang chungin vawi 18 shot an nei a, vawi li target-ah shot an nei. Real-in ball chang tlem mah se vawi 14 shot an nei a, vawi thum target-ah an shot - Vinicius Junior-a'n uiawm taka post a tih per kha lut ngat se Barca mualphona a zual ngei ang.