Player 10-a khel Leeds-in Man City an hneh

Inrinni zan khan player 10-a khel Leeds United-in Premier League champion tur Manchester City 2-1 in an hneh.

Etihad Stadium-a inkhelah Stuart Dallas hmangin minute 42-naah Leeds-in hma an hruai a, chawlhlawk hma chiahin Liam Cooper-a'n red card a hmuh avangin Man City chu chak tura rin zawk an ni zel.

Minute 76-naah Ferran Torres hmangin Man City-in si phurh an sut a, chakna goal khung inbeisei mah se injury time-ah Dallas-a'n Leeds tan chakna goal a khung ta zawk. Marcelo Bielsa hoten Pep Guardiola hote an barakhaih a, Champions League quarterfinal second leg khel tur Man City an insiamṭhat ran a ṭul hle.

Bielsa leh Dallas
Premier League kai thar Leeds United-in season ṭha tak an hmang a, match 31 khelh tawh aṭangin point 45 hmuin pakuanaah an awm mek a, an relegate thei tawh lo.

Leeds United thlen chin hi hlawhtlinnaah a ngaih theih a, an game hmuhnawm tak nena thlir tel phei chuan manager Bielsa hi fak loh theih loh a ni. Argentine manager Bielsa hian Guardiola hote hneh mah se amah hnathawh chhuang loin player-te a fak zawk.

Etihad Stadium-a Leeds-in hnehna an chan theih nan Dallas-a'n goal pawimawh a pahnih a khung. Minute 42-naa Dallas-a a goal hmahruai khung chu a kil em avangin keeper Ederson-a dem theih a ni lo.

Injury time-ah Dallas-a'n chakna goal a khung leh a, amah vengtu John Stones aiin a tlan chak a, tibuaitu karah ṭha takin a pet goal. Kum 29 mi Dallas hi kum 2012 kha chuan Irish Premiership club Crusaders FC tan a la khel chauh a, tunah chuan Premier League champion tur lakah a pet goal. Dallas-a hmasawnna chan hi a zuanin a zuang a tih theih!

Man City hi...
Manchester City-in Leeds hneh lo mah se an chhe ta thut tihna a ni lo. Pep Guardiola-a'n Champions League a ngaih pawimawh avangin a player pawimawh ṭhenkhat Kevin De Bruyne, Riyad Mahrez, Phil Foden, Rodri, Ruben Diaz leh Kyle Walker te a awltir.

Guardiola-a'n Barcelona a chhuahsan hnuah Champions League nomawi a la chawi miau loh avangin Europe inelna lama rilru a pe hi dem theih a ni lo a, inelna danga insawrbing turin Premier League-ah an dinhmun a ṭha tawh.

City boss Guardiola chuan, "Chance kan insiam tam tawk lo a, inkhelah chuan hetiang chang hi a thleng ve ṭhin. Hun tawp lamah khan counter attack hmangin min nawr a, an tlan chakna an hmang ṭangkai. A dan dan ṭha ber chu chak taka tlan ve a ni a, kan ti thei tlat lo," tiin a sawi.

Guardiola chuan sawi chhun-zawmin, "Tunah chuan kan awm hahdam ang a, ni hnih chhung Dortmund nena kan inkhel tur atan kan inpuahchah ang a, kan khelh dan turah thutlukna kan siam ang," tiin Champions League atana inbuatsaihna an neih chhunzawm tur thu a sawi.

Man City hian an mualah Borussia Dortmund hi 2-1 in an hneh tawh a, Nilaini zan dar 12:30 hian Signal Iduna Park-ah second leg kheh a ni dawn. German club hian away goal hlu tak an neih avangin English club hi barakhaih thei dinhmunah an ding.