City-in India-ah club neih an duh

Premier League hmahruaitu Manchester City chief executive officer Ferran Soriano chuan India-ah club neih an duh thu a sawi a, football khawvel titi a tling nghal.

Manchester City neitu City Football Group hian khawvel hmun hrang hrangah club pasarih an nei tawh a, City bakah hian New York City, Melbourne City, Yokohama F Marinos, Atletico Torque, Girona leh Sichuan Jiuniu-ah te neitu an ni mek.

City hotupa Soriano chuan, "Kum hnih vel chu India hi kan thlithlai tawh a, kuminah hi chuan he ramah hian club kan neih tawh ngei ka beisei a ni," a ti a, sum tamna India lam an hawi.

City hnuaia club
Manchester City neitu City Football Group hian thla hmasa lawk khan China-ah club thar an lei a, third division club Sichuan Jiuniu FC an lei.

China hma hian USA (New York City), Melbourne City (Australia), Japan (Yokohama F Marinos), Uruguay (Atletico Torque) leh Girona (Spain)-ah te club an lo nei tawh. City-in club an lei tawh zingah Sichuan leh Atletico Torque chiah hi an ram league sang bera khel lo awmchhun an ni a, mahse Torque pawh hi an lei hnuah an ram league sang berah an invawrhkai nghal.

Pun hi tamna!
City chief executive officer Soriano chuan, "Football tuipuina leh hun remchang kan neihna hmun zingah China chauh ni loin India pawh kan thlithlai a ni," a ti a, India chu China anga market ṭhatna hmun a nih thu a sawi tel.

Soriano chuan sawi zawmin, "City Football Group hian club pahnih emaw pathum tal chu neih belh kan tum a ni," tiin a sawi a, tun atan chuan India lamah an insawrbing.

City hnuaia club reng reng ten an thuhnuaia an awm hnua hma an sawn ṭhin dan ngaihtuahin Indian football an luhchilh phawt chuan Indian football-in ngaihven a hlawh sawt ang tih a chiang a, he thawm ringawt pawh hi Indian football tan thu lawmawm a ni.

Khawi lamah nge?
Kum 2015 khan Manchester City hian India-ah club neih an duh nia sawi thawm a lo awm tawh a, hetihlai hian an duhdan chuan Indian Super League khelh an duh a, Mohun Bagan nen sawizawm an ni.

Kuminah erawh Bagan sawi rik an ni rih lo a, City hian Mumbai City-ah share neih an duh niin phai lam media te chuan an tarlang - City thuneitute hian tun season-a Mumbai City match hmasa ber kha a hmunah an en.

Mumbai hi tun dinhmunah chuan Bollywood actor lar Ranbir Kapoor leh Bollywood film producer Bimal Parekh te ta a ni a, inremna an neih theih chuan football khawvel thuthar tling khawp inremna a ni ang.