Ball Boy Federer cup 100 chu

Mi bik an awm a, mahni thiamna muala midang chunga leng an awm bawk. Football pet turin Pele leh Diego Maradona an awm a, basketball mawina ti lang turin Michael Jordan a awm bawk - Roger Federer chu tennis khel tura piang a ni. Switzerland star Federer-a ban ding lam leh tennis racquet sawi hran theih a ni lo a, a zuitu chu nomawi a ni.

Federer-a'n Dubai Tennis Championship nomawi a chawi chiah khan nomawi 100 a nei tling a, tennis mipa player zingah Jimmy Connors nen chiah title 100 la tling thei an ni a, American legend Connors hian nomawi 109 a chawi hman.

Mellung pawimawh phun turin Federer hian kum 19 a mamawh. Hetih chhung hian hard, grass leh clay court-ah hlawhtlinna a chang vek - ram 19 aṭangin khawpui hrang hrang 30-ah hlawhtlinna a chang.

Nomawi 100 la tura a hun hmang chhung pawh a rei, court chhungah darkar 869 (52,152minutes) chhung hun a hmang; ni 36 chhung vel tihna a ni a, Harry Potter film full series pariat kha ṭum 44 ngawt a en zawh hman tihna a ni. Nomawi a chawi zinga a zatve ngawt hi Europe khawmualpui aṭangin a ni a, North America-ah 24, Asia khawmualpuiah 18 niin, heng bakah nomawi dang pariat chu Australia ram aṭanga a lak a ni.

Hmanah chuan
February 4, 2001 kha a ni a, Milan Indoors-ah Federer-a'n Julien Boutter hnehin ATP title hmasa ber a la. BBC chuan, "Mipa tennis huanga player beisei awm zinga mi," tiin a hunlai hian a sawi.

Nomawi hmasa ber a chawi hnuah Federer chuan, "Ka thil tum hmasa a hlawhtling a, tuna kan tum leh hmasa tur chu world number 15 chin nih a ni. Ka tan chuan thil sang tak ni mah se thil tih theih a ni," a ti a, a tum a hlawhtling chiang hle - chawlhkar 310 chhung number 1 nihna a hauh thei!

Tunah chuan Federer hi kum 39 mi a ni tawh a, nomawi hmasa ber a lak aṭangin season 19 a liam tawh. World number 4 ni mekin season hnuhnung pahniha a tih loh angin clay court-ah a inlan dawn a ni.

Ball boy chu
Basel, Switzerland-a piang Federer hian a naupan laia a awmna Basel-ah hian vawi kua ngawt nomawi a chawi. Germany rama grass court inelna pakhat Halle nen a hlawhtlin hnem berna a ni.

Federer hian Swiss German, Standard German, English leh French te nal takin a hmang thei a, heng bakah hian Italian leh Swedish a thiam tel bawk. An khua Basel-ah a naupan lai aṭangin tennis court a ngaina nghal a, 1992 leh 1993 te khan Swiss Indoors-ah ball boy-ah a ṭang.

Ball boy aṭanga bul ṭan ni mah se Grand Slam nomawi ngah ber a ni tawh a, major title 20 a chawi zinga pariat chu Wimbledon a ni a, Australian Open vawi ruk, US Open vawi nga leh French Open-ah ṭum khat a champion bawk. Wimbledon leh US Open bikah hian ani aia champion hnem an awm lo.

Final 152 zet
Nomawi 100 zet a chawih theih nan Federer hian final vawi 152 a khel a, ṭum 52 chu a chak lo zawkah a ṭang tihna a ni. Khawvel tennis player ropui bera ngaih ni mah se a famkim bik lo, a vanglai aṭanga tun thlenga a elpui ber Rafael Nadal chu a hneh loh hnem ber niin vawi 14 a ngam lo.

2008 Wimbledon final-ah player ropui pahnih hi an intawng a, Centre Court-ah darkar li leh minute 48 chhung an inkhel. Ruah surin a tihbuai bawk avangin final match rei zawng hi darkar sarih deuh tho niin, Spanish player Nadal-a'n 6-4, 6-4, 6-7 (5-7), 6-7 (8-10), 9-7 in hnehna a chang.

Final a khelh zinga ropui ber pakhatah chak lo mah se Federer te inkhelin ngahhlut a hlawh a, American legend John McEnroe chuan, "Tennis match khelh tawh zinga ropui ber," tiin 2008 Wimbledon final chanchin hi a sawi hial a ni.

Federer leh Nadal te inelna hi tennis khawvelah chua player pahnih inelna ropui leh ngaihnawm bera ngaih a ni a, anni rual hian Novak Djokovic leh Andy Murray te an rawn chhuak ve bawk - player ṭha rual tam tak kara Grand Slam vawi 20 champion thei a nihna erawh Roger Federer ropuina an sawi apianga sawi hmaih theih loh tur a ni ang.

Mipa zinga title la hnem te
Jimmy Connors 109
Roger Federer 100
Ivan Lendl 94
Rafael Nadal 80
John McEnroe 77

Federer - title 100 lakna te
Grand Slams 20
ATP Tour Finals 6
Masters 1000 27
ATP 500 Series 22
ATP 250 Series 25

Final-a Federer hneh ngun te
Rafael Nadal 10
Andy Roddick 7
Novak Djokovic 6
Andy Murray 5
Ivan Ljubicic 4

Kum tina Federer-a nomawi chawi dan
Kum Title Lak zat
2001 1
2002 3
2003 7
2004 11
2005 11
2006 12
2007 8
2008 4
2009 4
2010 5
2011 4
2012 6
2013 1
2014 5
2015 6
2016 0
2017 7
2018 4
2019 1