Tualchhung boxer hlang an ni ta

Yodha 4x4 Pickup LPS Pro Fight-ah a vawi khat nan state pawn boxer sawm luh an ni a, semifinal zan khatna an khelh zawh meuh chuan tualchhung boxer an ding chang - Arunachal Pradesh, Manipur leh Meghalaya aṭanga rawn inlan an tla kim. State pawn boxer pasarih zinga dam rei ber Heli Tana Tara chu F. Zoramchhana lakah a zinkawng a tawp.

Thawhṭanni zan khan R. Dengṭhuama Indoor Stadium, Mualpuiah semifinal khelh a ni a, nizan khan khelh chhunzawm niin Zirtawpni zanah final khelh a ni ang. March 12, Thawhlehni zan hian 'Title Fight' neih tur a ni ang.

Lightfly
Arunachal Pradesh aiawha national championship vawi thum khel tawh Heli Tana Tara-a'n a mikhualna ramah ṭan a hlawh a, a inhnek hmasa lamah a hmuhnawm ṭhin avangin F. Zoramchhana lakah pawh inrintawkna a nei sang hle.

Mahse, Cherhlun tlangval Zoramchhana a duai bik lo. Zoram­chhana'n tum dang aiin nawr tam lo mah se ṭha taka invengin a hnek let a, Arunachal Pradesh boxer nung leh thatho tak Heli Tana Tara lakah unanimous decision-in a chak. Cherhlun boxer-in inhnek a thunun bik lo hle a, chutihrualin judge pahnihin 49-46 pein judge pakhatin 48-47 in a chaktir a ni.

Bantam
Boxing thiam khua tia hriat lar Tuipui chhul chhuak Laldingliana'n inhnek hautak takah Lalrinsanga Tlau chu split decision-in a hneh hram. Judge pahnihin 47-46 leh 48-45 in an chaktir a, judge pakhatin 47-46 in lehlam a pe tam ve thung.

Boxer pahnihin chetsual hlau leh fimkhur takin an inbei tluan a, inhnek a tam lo. Kum 20 mi Dingliana'n amah aia kum hniha naupang lakah dik taka a ding lam a hnek chhuah ṭhin leh a vei lama a vai fuh a ṭhatpui. Inkhel inhnehtawk takah tawnhriat nei zawk Dingliana a dingchang.

Light
Meghalaya fighter Dondor Marwein hnehtu Zochuanawma Fanai-in semifinal a khelh hmain a ke a ti hliam a, duhthusamin inhnek a hmachhawn lo. Hetichung hian lightweight semifinal a hmuhnawm tho a, a vawi khat nana champion tum Vanlalawmpuia'n unanimous decision (48-47, 49-46, 48-47)-in hnehna a chang.

A tir aṭanga a tawp thleng­in Khuangthing tlangval Awmpuia'n a pan a, a hnek chhuak tam zawk. Thiamna kawngah langsar bik lo mah se tharum leh thahrui a neih chhawrin hnek chhuah mai a awlsam a, a bei ngawrh zawk bawk. GIG Motors Fighter of the Night atan thlan a ni hial.

Middle
Lightheavy champion vawi li ni tawh Abel Lalawmawia'n a vawi khat nana middleweight champion nih a tumna chu C. Lalduhawma lakah a thamral. Ramhlun South boxer hian a tir aṭangin na takin a nawr a, Serchhip tlangval Abel-a hi round hnihna tir lamah mitko hliam vanga khel chhunzawm thei loin technical knockout (Round 2, second 37) in a chak.

Kum 2016 khan Duh­awma'n Title Fight khel tawhin Zarzoliana a hneh lo va, tun ṭumah hian title hum­him turin Zotea a inlan dawn lo. Duhawma tan kawng a inhawng zau dawn, Zotea kalsan kawnghren rochuntu ni turin karleh Thawhlehni zanah a vawi hnih nan Title Fight-ah a inlan ang.

Lightheavy
Mipui hmuh chak palian inhnekah Jack Lalsangliana chuan round khatna minute hnih leh second 10 chauh an inhnek hman tihin a khingpui Hmingchungnunga chu a knockout nghal.

Inhnek tir lam rei lo te chhung kum 33 mi Hmingchungnunga'n beiseiawm takin a nawr hman. Mahse, Chaltlang Lily Veng boxer Sangliana'n bei letin a dingin a vai fuh a, Zemabawk boxer ṭanhmun a phet nghal. Sangliana'n nawr zuiin vawi sarih a hnek zawn a, Hming­chungnunga a chi ai zui.

Hmingchungnunga hian bei zui leh mah se awmzia a nei tawh lo va, Mizoram mixed martial art middleweight champion lai Sangliana'n a vei leh dinga a hnek zawn hnuin Hmingchungnunga a hawi buai hle a, referee tlazepin point a chhiar a, Zemabawk tlangval tan final luh beiseina a tawp zui nghal bawk.