James awmna Lakers tan playoff a hla?

Lebron James awm mah se Los Angeles Lakers tan NBA playoff khelh phak chu hna awlsam a ni dawn lo, tun din­hmun­ah Western Conference table-ah 10-na an ni mek, a sang pariat chinin playoff an khel dawn.

Nimin zing NBA regular season inkhelah Lakers hi Los Angeles Clippers lakah 113-105 in an tlawm a, January thla khan Lakers hian hnehna chang tawh mah se tun ṭumah chuan a chak lo zawkah an ṭang.

Clippers nen an intawn hnuhnung zawk hnuah Lakers hian match 12 an khelh zinga vawi kua ngawt an tlawm a, match ṭhenkhatah an thiampuipa James an chhawr thei lo chu thuhran ni se, Ame­rican star hi a inlan ṭum pawhin an beisei ang result an nei hleithei lo a ni.

Lakers hian an match lekpek atan Ningani zing dar 9:00-ah Denver Nuggets an hmachhawn dawn a, Clippers hian Inrinni zingah Oklahoma City Thunder an khing ve leh thung ang.