Paris-ah United tan beisei tur a awm em?
UEFA Champions League last 16-ah Manchester United chuan zanin dar 1:30 hian Le Parc des Princes-ah Paris Saint-Germain an tlawh dawn. French champion hian Old Trafford-ah 2-0 a hnehna an chan avangin Ole Gunnar Solskjaer hote tan beisei tur a tlem tawh hle.
Beisei bo
PSG hi Neymar leh Edison Cavani tel loin Old Trafford-ah an lenglut a, Manchester United-in beiseina an nei sang. Amaherawhchu, French club-in Presnel Kimpembe leh Kylian Mbappe te goal hmangin an barakhaih a, United tana harsatna belhchhah turin Paul Pogba chu hnawhchhuah a nih avangin second leg-ah an inlan thei dawn lo.
Hliam vangin United an buai zui a, midfielder pawimawh pahnih Ander Herrera leh Nemanja Matic bakah Juan Mata, Phil Jones, Anthony Martial, Matteo Darmian leh Alexis Sanchez te an khel thei dawn lo. Solsjkaer hote hian kim thlap pawhin PSG hmachhawn se tho chhuak tura rin an ni lo a, an dinhmun khaikhawmna tawi fel ber chu 'beisei bo' tih a ni.
Beiseina tlem
Manchester United-in kartawp khan Southampton lakah ṭum hnih an hnufual hnuin an lethal a, 3-2 in an chak. Norwegian manager Ole Gunnar Solskjaer chuan December thlaa United a enkawl aṭangin khualmualah a zawnin match riat hnehna an chang tawh bawk.
Solskjaer chuan, "Tlawm thei lo anga (invincible) inngaihna kan nei a, inkhel zawng zawngah chak beiseina kan nei. First leg-ah 2-0 ni mah se kan inringtawk hle. Chutihrualin kan hliam neih dan zawng zawng nen chuan a harsa dawn tih chu kan hria, hun chanve hma lama goal an khung theih chuan inkhel kalhmang a dang ang," tiin beiseina an laneih thu a sawi.
United hian hliam an ngah avangin academy player tan squad-a awm theihna hun ṭha a ni dawn a; Tahith Chong, James Garner, Angel Gomes leh Mason Greenwood te zinga pahnih khat tan bench bakah khelhna hun thleng pawhin a awm thei ang.
PSG lam
French champion tan Neymar a la inlan thei dawn lo a, Edinson Cavani erawh bench-ah tal chuan a awm theih tawh besei a ni a. Belgian defender Thomas Meunier pawh first leg a khelh loh hnuah rawn inlan leh tawhin French Cup quarterfinal-a Dijon an hneh ṭumin goal thumna a khung.
PSG hian United an hneh hnuah match nga khel leh tawhin an chak vek a, Kylian Mbappe chuan match li a inlanah goal a khung vek. Old Trafford-a United tana hnawksak ber zinga mi Angel di Maria pawhin goal li a khung ve bawk a, English club tan chanchin hriat nuam a ni lo ang.
Zanin Inkhel Tur
FC Porto 1:30 AM AS Roma
1st Leg-ah Roma 2-1 in an chak
PSG 1:30 AM Man United
1st Leg-ah PSG 2-0 in an chak