Ranking-ah Kyrgios a zuang sang

Thawhṭanni zan khan mipa tennis thuneitu sang Association of Tennis Professionals (ATP) leh hmeichhe lama thuneitu Women's Tennis Association (WTA) te chuan world ranking thar an ti chhuak a, a chung ber dinhmun luahtu chu Novak Djokovic leh Naomi Osaka te an ni.

Nick Kyrgios chu hmasawn berte zinga mi a ni, Australian tlangval hian world number 72 ni chungin Mexican Open a khel a, world number 2 Rafael Nadal leh number 3 Alexander Zverev te hneha nomawi a chawi theih avangin 33-naah a inhlangkai.

Dubai Championship-a hlawhtlinna a chan hnuah Roger Fedrer pawhin hma a sawn leh a, Grand Slam vawi 20 champion tawh hian player pathum kal kanin palina dinhmun a luah. Australian Open semifinalist Stefanos Tsitsipas chu a sang zual 10 zingah a hming a chuang ve bawk.

Hmeichhe lamah US Open leh Australian Open nomawi kawltu Osaka tluk thei an la awm lo. Japanese nula elphak ber tura ngaih Simona Halep a la khel fuh hleithei lo a, Romanian nula hian a chung bera awm leh tur chuan clay court season a hman ṭhat a ngai dawn a ni.