Lean On Me singer Bill Withers a thi
Khawvel huapa hla lar leh hla ṭha, Lean On Me phuahtu leh sa lartu ni bawk Bill Withers chu Thawhṭanni khan kum 81 mi niin lung lam ṭhat lohna avangin a thi.
Bill Withers chhungte hian nimin khan a thih thu hi an puangzar a, Los Angeles-ah a thi tih an tarlang tel bawk.
Kum 1970 chho khan Withers hian hla ṭha tak tak a ti chhuak nasa hle a, Lean on Me bakah hian Ain't No Sunshine pawh kha a hla a ni a; khang hun laia hla lar Just The Two Of Us, Lovely Day leh Use Me-te pawh kha a phuah a ni.
Lean on Me phei hi chu Billboard Hot 100 leh Soul Singles chart-ah No.1 a nihpui hial.
Kum 1985 hnu lamah hla record nei tawh lo mah se a hla tam tak hi chu R&B leh hip-hop khawvela hla lar tak tak an ni hlawm.
Zaithiam lar dangte pawhin social media kaltlangin Withers an sunna leh an ui thu an tarlang nasa hle a, Chance The Rapper phei chuan "the greatest" ti hialin a thlah.
Lean On Me hi Gospel music lam hawi a nih bawk avangin khawvel puma Kristian biak-in hrang hrangah pawh sak a hlawh hle a, Barack Obama leh Bill Clinton lakluh inkhawmah pawh sak a ni nghe nghe.
A nupui Marcia leh a fate pahnih Todd leh Kori a kalsan a ni.