Germany-ah Boateng, Hummels leh Muller tan hmun a awm lo!

Germany coach Joachim Low chuan FIFA World Cup 2014-a champion puitu Jerome Boateng, Mats Hummels leh Thomas Muller te chu ram tan thlan a tum tawh loh thu a hrilh.

Boateng leh Hummels te hi kum 30 mi ve ve an ni a, Muller hi kum 29 mi chauh niin Bayern Munich trio te ram tana an khelh belhkhawm hi 246 lai a ni. Amaherawhchu Die Mannschaft hian World Cup hnuhnung berah group stage an paltlang thei lo a, Nations League-ah League A aṭangin an relegate bawk.

Kum 59 mi Low chuan, "Kum 2019 aṭangin German national team chuan bul kan ṭan ṭha leh ang. Hmel thar chhawpchhuah kan duh a, thutlukna dik a nih ngei pawh kan ring. Player naupang zawkin intuaihriam turin hmun thawl an nei ang a, an chungah mawhphurhna pawh a awm tawh ang," tiin player naupang zawk a chhawr tur thu a sawi.

Germany tana Boateng, Hummels leh Muller te khelh hnuhnun ber chu October 30, 2018 kha niin Netherlands lakah Nations League-ah 3-0 in an tlawm. Ni thum hnuah France lakah an chak lo leh a, Germany hi calendar kumah a vawi khat nan vawi ruk an chak lo a, kum 2000 hnua a vawi khat nan competitive match-ah a zawnin an chak lo bawk.

Joachim Low enkawl Germany hian March 21 hian Volkswagen Arena-ah Serbia chu friendly match-ah an mikhual dawn a, March 24 zanah Netherlands nen UEFA Euro Qualifier-ah an inhmachhawn zui ang.