Highlanders tan semifinal hmasa ber

Indian Super League-ah NorthEast United chuan a vawi khat nan semifinal an khel dawn a, zanin dar 7:30 hian first leg-ah Bengaluru FC an mikhual ang.

NorthEast United hian league match 18 an khelhah vawi sarih hnehna changin vawi thum chiah an tlawm a, palina nichungin semifinal hi an lut.

Highlanders tan goal 12 khung tawh Bartholomew Ogbeche chu tlarhmaah innghahna tur a ni dawn a, Uruguayan attacking midfielder Federico Gallego leh Rowllin Borges an pawimawh viau bawk ang.

NorthEast United tan league match 18 an khelha inlan kim vek K. Lalṭhathanga chu inkhel bul a ṭan ngei beisei a ni a, match 13 kheltu Robert Lalthlamuana chu bul ṭan tura beisei a ni bawk.

Bengaluru tan match 16-a goal riat khunga assist vawi hnih neitu Sunil Chhetri chu innghahna tur a ni a, Highlanders-in Ogbeche an neih miau avangin Gurpreet Singh Sandhu tan chet ṭhat a ṭul ang.

Bangalore club tan season chawhnu lamah Edmund Lalrindika a inlan ṭhin a, Lunglei rawlthar hi bench aṭanga a luh a rinawm mah zawk.