Pro Fight final khel tur a hriat kim

Yodha 4x4 Pickup LPS Pro Fight chu Thawhlehni zan khan R. Dengṭhuama Indoor Stadium, Mualpuiah semifinal khelh zawh a ni. Match 8, Zirtawpni zan hian final khelh zui tur a ni a; Title Fight chu March 12 zanah neih tur a ni ang.

SAI Centre, Mission Vengthlanga boxing zirlai pahnih inhnekah Lallawmawma chuan Zorammuana chu unanimous decision (49-47, 50-45, 50-45) in a hneh a, Tuipui rawlthar hian a vawi khat nan lightfly final a khel dawn.

Bantam huangah HC Lalramfela'n GIG Motors Fighter of the Night lawmman dawng thei tur khawpin a khel ṭha a, Chawngtlai tlangval hian a khingpui Yuri Lalbiakdika Sanate chu unanimous decision (50-45, 49-46, 48-47) in a hneh a, a vawi hnih nana champion turin kawng dik a zawh.

Light weight boxer Zomuansanga chuan awlsam takin semifinal a paltlang. Khatla South boxer hi Model Veng tlangval Lalruatkima lakah a chungnung takzet a, judge pathum ten 50-43 vekin chakah an puang. Zomuana hian a vawi khat nan final a khel dawn.

Middle weight champion lai Zarzoliana a inlan thei lo a, hei vang hian K. Lalpianglawma hnehtu H. Lalrinhlua chuan final khelh ngai loin 'Title Fight' a hmachhawn tlang dawn. Zan hmasa lama semifinal paltlang tawh C. Lalduhawma nen kawnghren an inchuh dawn a ni.

Palian inhnek hmuhnawmah DK Munga chuan Vanlalchhuanga lakah unanimous decision (48-43, 48-43, 48-43) a hnehna changin Pro Fight vawi hnih a khelhnaah final a lut. Hrianghmun tlangval hian final-ah Chaltlang Lily Veng chhuanvawr Jack Lalsangliana a hmachhawn ang.

March 5, Thawhlehni zan
Pro Fight Semifinal Result

Lightfly
Lallawmawma, Tuipui bt Zorammuana, Tuipui
Unanimous Decision (49-47, 50-45, 50-45)

Bantam
HC Lalramfela, Chawngtlai bt Yuri Lalbiakdika Sanate, Vaitin
Unanimous Decision (50-45, 49-46, 48-47)

Light
Zomuansanga, Khatla South bt Lalruatkima, Model Veng
Unanimous Decision (50-43, 50-43, 50-43)

Middle
H Lalrinhlua, Hnahthial bt K Lalpianglawma, Sihtlangpui
Unanimous Decision (50-44, 50-44, 50-44)

Lightheavy
DK Munga, Hrianghmun bt Vanlalchhuanga, Lunglei Venglai
Unanimous Decision (48-43, 48-43, 48-43)
GIG Motors Fighter of the Night - HC Lalramfela, Chawngtlai

Pro Fight Final - March 8, Zirtawpni

Lightfly
F Zoramchhana, Cherhlun vs Lallawmawma, Tuipui

Bantam
Laldingliana, Tuipui vs HC Lalramfela, Chawngtlai

Light
Vanlalawmpuia, Khuangthing vs Zomuansanga, Khatla South

Lightheavy
Jack Lalsangliana, Chaltlang Lily Veng vs DK Munga, Hrianghmun