Chinese Super League - An ṭan leh ta

European football-a league langsar tih loha khawvelin league a ngaihven ber ang hiala chhal ngam chu Chinese Super League a ni.

Khawvel player langsar tak tak ten sum uma khelh nana an thlan CSL hi kar hmasa khan an khel ṭan leh der tawh a, ngaihven a hlawh nghal hle. Manchester United midfielder hlui Marouane Fellaini chuan a club thar Shandong Luneng tana a match hmasa berah goal a khung nghal a, Beijing Renhe lakah 1-0 in hnehna a chanpui.

Tun hnaia China-a pem thar player langsar zingah Mousa Dembele chuan Tottenham Hotspur chhuahsanin Guangzhou R&F a zawm bawk a, CSL-in ngaihven a hlawh zui zel hi a mak lo.

Cruyff-a fapa
Chinese Super League-ah hian footballer leh manager ropui Johan Cruyff-a fapa Jordi Cruyff pawh a awm a, Barcelona leh Man­chester United tan pawha lo khel tawh ṭhin hi Chongqing Dangdai Lifan coach a ni mek.

Kum 45 mi manager hian inkhelh a chawlhsan hnuah pawh sporting director hna chelhin Cyprus leh Israel thlengin hun a lo hmang tawh a, player a nih laiin England, Spain, Ukraine leh Malta thlengin a hmelhriat bawk.

Jordi Cruyff chuan, "An vai deuhthawh hian sapṭawng an thiam lo a ni ber a, chuvang chuan team enkawl hi a hautak em em a ni," tiin China-a club enkawl harsat zia a sawi.

Hetichung hian Chinese Super League-a club 16 zinga 12 chuan rampawn lam mi coach atan an ruai a, Italy defender hlui Fabio Cannavaro ( Guangzhou Evergrande), Watford boss hlui Quique Sanchez Flores (Shanghai Greenland), Wales coach hlui Chris Coleman (Hebei China Fortune)-te chu tin dinhmuna coach langsar zual an ni.

Player langsar
Chinese Super League-ah hian club tinin ram pawn player pali bak neih phal a ni lo a, hetichung hian CSL club-ah hian khawvel huap pawha player langsar tak tak an la tam hle.

Dalian Yifang chuan Atletico Madrid winger hlui Yannick Carrasco leh Napoli legend Marek Hamsík an kawl mek a, Guangzhou Evergrande-ah Barcelona aṭangin Paulinho chu a kir leh tawh bawk.

Guangzhou R&F-in Dembele an lalut thar a, Hebei China-in Ezequiel Lavezzi leh Javier Mascherano an la kawl a, Jiangsu Suning-in Ramires, Alex Teixeira leh Inter Milan forward hlui Éder-te an la kawl reng.

Shanghai SIPG tan CSL-ah Hulk leh Oscar te chu player langsar an la ni reng a, Wuhan Zall midfielder Stephane Mbia, Shanghai Shenhua striker Odion Ighalo leh midfielder Fredy Guarín te pawh European football-a player langsar lo ni tawh ṭhin an ni.

Hma hun chu
China hian football-a sum tam tak an sen chhan a awm a, foreign player pali chiah neih theih a nih chhan a awm bawk - an ram President Xi Jinping hi football-ah a tui tlat a, World Cup la thlen ngei pawh a tum.

Kum 2002 khan China hi a vawi khat nan World Cup-ah an tling a, Asian Cup chu 2004 khan thlengin final an lut a, mahse hemi hnu lamah hian Asian Cup-ah pawh quarterfinal an la lut leh rih lo. Cruyff chuan, "Kawng thui tak kal tur an la nei a, mipui tam tak an awm chungin talent zawnchhuah chu tih tur an la neih a ni," tiin talent ṭha ber ber zawnchhuah an la nih loh thu a sawi.

Netherlands international hlui chuan, "Naupang chu kum 15 mi a nih huna zirtir tur niloin kum riat aṭanga zirtir a ngai," tiin naupan tet aṭanga training mumal neih chu football hmasawn nan a pawimawh thu a sawi a, chu chu China hmabak a la nih thu a sawi bawk.