Real ngamtu Ajax

Real Madrid-in rawlthar rual Ajax an zuam sual a, Champions League last 16 aṭangin petchhuah an ni - Thawhlehni zan khan Ajax hian 4-1 in Santiago Bernabeu-ah champion lai Los Blancos an hneh.

Team pahnih intawn hmasak zawkah Real hian 2-1 in hnehna an chang a, khualmuala chak an nih bawk avangin Spanish club hi tlang chiangah ngaih an ni.

Mahse, Ajax-in football khawvel barakhaihin Santiago Bernabeu chu 'training ground' ang lekah an chantir a, si hnih faia chak thei tura beisei loh khan si li khungin hnehna an chang.

Ajax tan Hakim Ziyech, David Neres, Dusan Tadic leh Lasse Schone ten goal khat ṭheuh an khung a, Real Madrid tana Marco Asensio goal khung chu mualpho zualpui khuhna chauh a ni - defender Nacho chu injury time-ah a yellow card pahnihna avangin hnawhchhuah zui a ni.

Barakhaih!
Real Madrid-in Ajax nawr nghal mah se Dutch club-in minute sarihna lekah goal an rawn khung nghal a, season duhawm tak hmangtu Ziyech chuan Tadic-a siamsak chu harsatna nei loin goal-ah a lo chantir.

Ajax rawlthar rual an phur telh telh a, quarterfinal lut tura an mamawh zat goal hnih chu minute 18-na lekah an khung fel der - kum 22 mi midfielder Neres chuan an goal hnihna hi a rawn khung.

Santiago Bernabeu-ah Real an hawihai a, Ajax-in an la duhtawk mai lo. Goal hmasa pahnih siamtu Tadic chuan an goal thumna a rawn khung ve leh a, Real tan Asensio chuan an goal thumna an chhuah aṭanga minute riatnaah a rawn khung ve 'zuai'.

Real hlim chhung a rei lo. Ajax player zinga tawnhriat ngah ber pawl kum 32 mi Schone chuan freekick ropui a rawn khung a, 4-1 in Ajax an chak.

Chulhnu vul thar
Ajax-in Real Madrid an hnawt chhuak a, he result ṭha tak an hlawhchhuah theih nana player thawhhlawk 'fal' tak tih ngam Dusan Tadic hming lam rik loh theih a ni lo.

Tadic hi season hmasa lawk kha chuan Southampton tan a la khel a, season tluanin goal sarih chiah a khung - mahse a tlangnelna hmun Netherlands lama a kir hnuah a vul leh mek. Real lakah assist vawi hnih a neih bakah goal khat a khung a, an goal hnihna Neres khung tur a siamsak dawna Casemiro a bum dan chu 'nakin' thlenga an la sawi tur khawpa 'mawi' a ni.

Serbian striker hian tun season-ah Ajax tan match 40 khelin goal 26 a khung leh der tawh. Kum 30 tlin hnuah a vul thar leh a, Ajax-in quarterfinal piah lam an thlir chuan Tadic chet ṭhat zel a pawimawh ang.

Rawlthar rual
Khawvel huapa langsar player an chher ṭhin avanga hriat hlawh tak Ajax-in kum 13 hnua a vawi khat nan Champions League knockout round lut ve leh chiah mah se an hmingthan ṭhinna kha an la hloh lo - player naupang rual an nei ṭha hle.

Real Madrid laka inkhel bul ṭan 11 zinga paruk ngawt kha kum 22 hnuai lam an ni a, tlarhnung laia Daley Blind nena inkawp Matthijs de Ligt kha kum 19 mi lek niin European club liante chil ti puttu a ni. Season thara Barca pan tur Frenkie de Jong hi kum 21 mi a ni a, pound maktaduai 65 man niin Bernabeu-ah a tlangnel hle. Right back Noussair Mazraoui pawh kum 21 mi lek a la ni a, goalkeeper André Onana lah kum 22 mi niin Cameroon tan vawi riat a inlan der tawh.

Thibaut Courtois tana hna hautak siamsaktu Donny van de Beek kha kum 21 mi niin Netherlands tana vawi nga inlan tawh a ni - De Jong an chan tawh a, Ajax tan an player ṭha rual chelh hi 'chona' pakhat a ni ang.

Ramos tan inchhirna
Real tan captain Sergio Ramos chuan first leg-a Ajax nena an inkhelhin yellow card a hmu 'lui'. Spanish defender hian yellow card pahnih a neih sa hre ranin second leg-ah an chak chian a inbeisei a, quarterfinal-a hrem pumpelh nana he thil hi ti a ni.

Mahse, Ramos-a beisei ang ngawt a lo ni lo. Inkhelh hmain Ajax midfielder Frenkie de Jong chuan, "Ramos hi a thiltih avang khan a inchhir ang," a ti a, a thusawi dikna thlentirin Ramos-a'n quarterfinal hmel a hmu dawn ta lo. Real Madrid coach Santiago Solari dinhmun a derthawng nghalah ngaih a ni - Real hi Copa del Rey aṭangin Barca-in an hnawt chhuak a, La Liga-a an beiseina an tihtawp sak zui a, Ajax-in Champions League aṭangin an hnawt chhuak ve leh ta.

Solari erawhin a hma hun eng taka thlirin, "Hun harsa taka he club ka enkawl dawn khan beidawng leh mai mai turin ka lokal lo. Madrid hi kan vai aia lian a ni a, hei aia chak zawk hian a in dinthar leh ang," tiin a sawi.

Thlirna Tawi
1st Leg : Ajax 1 - 2 Real Madrid
AJA : Hakim Ziyech 75'
RMD : Kaim Benzema 60'; Marco Asensio 87'

2nd Leg : Real Madrid 1 - 4 Ajax
RMD : Marco Asensio 70'
AJA : Hakim Ziyech 7'; David Neres 18'; Dusan Tadic 62';
    Lasse Schone 72'
Agg-ah Ajax 5-3 in an chak

Ngaihnawm
* Ajax-in 2002-03 hnua a vawi khat nan quarterfinal an thleng
* Real Madrid-in 2009/10 hnua a vawi khat nan round of 16-ah an tla.
* Real Madrid-in April/May 2004 hnua a vawi khat nan inelna hrang hrangah a zawnin match li an chak lo.