Bayern-in PSG lehthal an tum : PSG tlarhnung a pawp - Neuer
Bayern Munich captain leh an si ban nghaktu rinawm Manuel Neuer chuan Paris Saint-Germain tlarhnung a pawp tih a sawi a, zanin dar 12:30 a an intawn hunah Paris club hi an lehthal theih ngei a rin thu a sawi bawk.
Champions League nomawi kawltu Bayern hi kar hmasa khan Allianz Arena-ah 3-2 in an chak lo, quarterfinal paltlang tur chuan a tlem berah goal hnih tal an khung a ngai dawn - Hansi Flick naute hmabak a hautak tawh dawn hle.
Boruak inang lo
Team pahnih hi mahni rama champion lai ve ve an ni a, an ropui hle. Mahse tunlai an boruak tawn erawh a inang lo. PSG laka an chetsual hnuah Bayern hi Union Berlin nen 1-1 in an inhnehtawk chhunzawm.
Bundesliga hmahruaitu erawh an la ni chhunzawm tho a, chutih rualin an striker ṭha ber Robert Lewandowski tel lo chuan an tlarhma a bil tih phat rual a ni lo, zaninah pawh Poland international tel loin an khelh a la ngai dawn.
PSG erawh Bayern an ngam hnuah Strasbourg an sawp zui leh a, an thiampuipa Kylian Mbappe-a'n goal a khung chhungzawm zel bawk. League match lamah inlan lo Neymar a inlan dawn bawk a, Bavarians ang lo takin an ṭhat dan berin an khel ang.
Bayern inringtawk
Lewandowski awm lo mah se, tawnhriat ngah Thomas Muller hoin Kingsley Coman, Leroy Sane, Serge Gnabry leh Eric-Maxim Choupo-Moting te an la awm dawn a, tlarhma lai aiin a sir lamah an hlauhawm zawkin a rinawm.
Bayern captain Neuer chuan, "Munich khawpuiah khan hun ṭha tam tak kan khawhral, Paris-ah erawh chuan khatiang hun ṭha kha a takah kan chantir tawh ang. Na takin kan nawr dawn a, an tlarhnung a phui tawk loh avangin an buai hle ang.
"PSG hian risk an la nasa, season hmasa ai khan ball an hloh nasain an inveng ṭha tawk lo. Chuvangin kan player tlan chak leh fing tak tak ten an su hawng thei ngei ang," tiin Parc des Princes-ah ngei hnehna hlado chham a tum hle.
Bayern player pawimawh Joshua Kimmich pawhin an chak theih ngei a beisei. Germany international chuan, "Kan intawn hmasak khan an hun ṭha neih pathumah an khung vek, khatiang chu a ni tawh bik lo ang," a ti a, an team player chu rilru huaisen tak an nih a ngaih thu a sawi bawk.
German champion hian UCL first leg an chak loh hnuah thawh leh an harsat ṭhin, first leg an chak loh hmasakna match hnuhnung paliah an tla vek. Flick enkawl team hi ropui taka thawh chhuah tum mah se an hna a hautak dawn hle.
Poch-a Paris
Barcelona an pet chhuah hnuah Beyern Munich meuh an mualah an hneh thei a, manager thar Mauricio Pochettino lakah Paris Saint-Germain beiseina a sang tawh vet vet hle ang tih a chiang - an tum ram erawh an la thleng lo.
Ligue 1 lama hrem tawk Neymar-a'n hahchawlhna hun a ngah a, thaza zek zawkin German club a mikhual thei dawn. Pound maktaduai 200 man forward hi RB Leipzig (23 goals) leh Wolfsburg (26) aia league goal chhuah hnem Bayern (36) tan ven uluk a ngai dawn.
Neymar thiamzia inhrilh nawn a ngai lo, chutih rualin season kal laiah chuan PSG tana a changtupa chu 'Mbappe' a ni thung. France international hian an intawn hmasak khan goal hnih a khung a, kum 22 mi chauh la ni mah se UCL champion turin a puitling tawh.
Nimin tlai khan Poch tana thu lawmawm a awm belh. An intawn hmasaka an chhawr theih loh Marco Verratti leh Alessandro Florenzi te chu coronavirus lak aṭangin an filhlim tawh a, training zawm pangngai tawhin zaninah an inlan thei dawn.
Paris club hian tun hmain Barcelona lakah 4-0 ngawta hma an hruaina an thamraltir tawh a, season hmasa khan UCL nomawi an ban phak maia inhung chu Bayern lakah hian an chan tawh bawk. An thil tawn tawh aṭanga chhutin Bayern lakah hian fimkhur taka an khelh a ngai ang.