Arsenal an chak ve ta

Inelna hrang hranga match li chhung chak ni hmel an hmuh loh hnuah Arsenal an chak ve leh ta. Gunners hian an mikhualna ramah Sheffield United 3-0 in an hneh a, season thara Premier League khel chhunzawm turin an dinhmun a ṭha tawh.

Table mawngphah luahtu Sheffield hi chhiarkawp danin la tling thei mah se, match 31 aṭanga point 14 chauh an la hmuh avangin an tla chiang tawh tlukah a ngaih theih - him tur chuan thil mak a thlen a ngai tawh dawn.

Pathianni zan Bramall Lane a inkhelah Gunners tan Alexandre Lacazette-a'n goal hnih a khung a, rawlthar duhawm Gabriel Martinelli chuan captain Pierre Emerick-Aubameyang hmunruak luah khatin goal khat a khung bawk, nuamsa takin hnehna an chang.

Hliam vangin season kal laiah Martinelli kan hmu tam lo, January thla hnua a goal khung lehna hmasa ber a ni. Brazilian player hian goal khat chauh khung mah se tlarhma lamah a thawh hlawk a, an khingpui tlarhnung chhaih buaitu pawimawh a ni.

Arsenal manager Mikel Arteta chuan, "Mawi taka khel chungin inkhel kan thunun a, goal mawi tak tak pathum kan khung bawk. Ka naute khelh danah khan sawisel tur ka hmu lo, lawmna tur lam hlir a ni zawk.

"Bukayo Saka khan a malpuiah harsatna a nei a, a nasat loh ka beisei. Gabriel Martinelli pawh a ke rek na deuh mah se mi tuarchhel leh fei a nih avangin buana a awm lo ang. Prague laka hun ṭha hlahtu Lacazette a chesual nawn lo kha a lawmawm," a ti.

Gunners hi an match hnuhnung berah Slavia Prague nen 1-1 in an inhnehtawk. Ningani zan hian Europa League quarterfinal second leg khel turin Czech Republic an pan ang, tlang tur chuan goal khung ngei ngei an ngai dawn.