Legends hmaah Hunthar

Vawiin chawhma dar 9:30 hian Khaled Memorial 2nd Division Screening Tournament chu a hmawr bawk a ni dawn a, league round lama chungnung ber Legends leh pahnihna Hunthar an inhmachhawn ang.

Cricket Association of Mizoram hnuaiah Khaled Memorial hi inelna sang pahnihna a ni, final lut team pahnih hi season tharah chuan 1st division club an ni tawh dawn a, an kaisanna hi nomawi nena lawm ngei an duh dawn.

Legends hian tournament an khel ṭha a, match sarih aṭanga vawi ruk chakin nuamsa takin an tlang. Hunthar hian league match tawp dawn lamah an elpui Chaltlang leh G. Lalbiakvela awmna Luangmual nek chhuakin a vawi khat nan final an lut.

League round lama an intawn ṭumin Hunthar hian Pradeep Kumar an ngam lo. Legends ball vawm thiam hian over 7.1 a vawm aṭangin wicket ruk a la thei a, run 24 chauh a pe bawk - hnehna chang let tur chuan batsman lam an fimkhur a ngai dawn.

Nimin khan Suaka Crikcet Ground, Sihhmuiah Mahuma Memorial 1st Division Screening Tournament pawh khelh chhunzawm a ni a, team ṭha Kulikawn chuan Bawngkawn South lakah run 178 zetin hnehna an chang.