Asian Championship-ah Jeremy

Asian Senior Weightlifting Championship 2021 khelh turah Jeremy Lalrinnunga a inlan dawn a, inelna hmachhawn tur hian Indian Weightlifting Federation (IWLF) chuan player pasarih a tlang chhuak a ni.

April 16-25 chhung hian Tashkent, Uzbekistan-ah inelna hi an nei dawn a, vawiin hian tournament khelhna tur hmun panin India ram an chhuahsan ang. Inelna hi Tokyo Olympic qualifier an hmachhawn hnuhnung ber tur a nih avangin a pawimawh.

Jeremy chuan, "Inbuatsaihna ka nei ṭha, nitin zing leh tlaiah rim takin kan bei a, chuvangin inrintawkna pawh ka nei sang hle. Mahse, tunlai khawvelah chuan hrileng vangin fimkhur a ngai dawn takzet.

"Indian team hi thlawhtheihna pakhatah kan chuangho dawn a, kan zinga pakhat lawhin coronavirus a kai a nih chuan kan vaia quarantine kan ngai dawn, chuvangin hrileng laka kan fihlim theih nan Mizo mipuite min ṭawngṭai pui turin ka ngen," tiin Vanglaini a hrilh.

Youth Olympic gold medalist Jeremy hi 67kg huangah a khel dawn, season hmasa khan hrileng vangin Olympic qualifying hi an khel mumal thei lo. Qualifier vawi ruk an hmachhawn tawh chinah Jeremy a che chhe loa, Indian player zingah a chungnung bawk.

Mizo rawlthar hi nipui laia neih tur Tokyo Olympic atan a dinhmun a ṭha tawk tawh. Chutih rualin qualifier a la zawh loh avangin 'official' taka puan a la ni lo thung, tun ṭuma inelna an hmachhawn zawh hian International Weightlifting Federation chuan a ti chiang ang.