Chelsea tan semifinal a hnai

Zanin dar 12:30-ah Champions League quarterfinal second leg khel turin Chelsea an inlan dawn a, Blues hian Porto an 'mikhual' dawn.

Team pahnih hi Covid-19 dan khirh tak avangin an intlawh tawn thei lo a, an match hnih hi Sevilla khelmual Ramon Sanchez-Pizjuan Stadium-ah khelh tur a ni. Quarterfinal first leg-ah Chelsea-in 2-0 in hnehna an chang a, he inkhel hi Blues tan 'away' a ni. Seville khawpuiah tho inkhel leh dawn mah se zanina an inkhel tur erawh London club tan 'home' a ni dawn thung.

Porto tan goal hnih tal khung a, goal chhuah loh a ngai dawn tihna a ni a, a harsa dawn - Chelsea-in semifinal mitthla chungin Porto an hmachhawn ang.

Chelsea an vul
Blues-in April 3 zan khan rin loh takin West Brom chu 5-2 in an ngam lo a, mahse, an insiamṭha rang hle. Europe-ah Porto an ngam zui a, ngaih ṭha takin Spain an hawsan.

Inrinni zanah Chelsea hian league match an khel zui a, top four ni tura an elpui Liverpool chak thu hre sain an inlan - pressure a sang ang tih a chiang a, khualmuala inkhel tur Blues tan hmabak a hautak hle. Mahse, Thomas Tuchel-a'n a enkawl hnua hmasawn Chelsea-in Palace lakah an zia an chhuah a, harsa lo takin Palace chu 4-1 in an sawp.

An match hnuhnung pahniha Chelsea khelh dan enin goal hnih nei sa chunga Porto laka tlawm tura dah an harsa a, chutihrual chuan football-ah chuan eng pawh thleng thei a ni, tih theihnghilh loh a ṭha.

Mahse...
Chelsea an inringtawk ang tih a chiang a, chutihrual chuan Porto an hmachhawn zawhah he team hian FA Cup semifinal an khelh zui dawn avangin Tuchel-a tan player siksawi thiam a ṭul ang.

Chelsea-in FA Cup final luh an inchuhpui tur hi Manchester City an ni. London club tana chanchin lawmawm dang chu an squad-ah inhliam tharlam an awm lo a, Tuchel-a'n a duh ang player a thlang thei dawn. Chuti a nih chuan Blues tan tlarhma lamah Hakim Ziyech, Timo Werner leh Olivier Giroud-ten bul ṭan an beisei thei dawn tihna a ni a, N'Golo Kante hliam a dam tawh bawk.

Tuchel-a'n Edouard Mendy-a ring nawn a nih chuan Senegalese goalkeeper hian si ban nghaktu zinga Champions League-a a zawna vawi riat English club chakpui thei Fabien Barthez-a record nihrual a beisei ang.

Porto lam hi
Portuguese club-in Chelsea an ngam loh hnuah league match khelin Tondela chu 2-0 in an hneh a, Juventus petchhuaktu team hian semifinal luh ngei tumin an theihna zawng zawng nen an khel ang.

First leg-a hrem vanga inlan thei lo Mehdi Taremi leh Sérgio Oliveira-te an chhawr thei leh tawh dawn a, danglamna thlen thei player an ni - Iranian forward Taremi hian tun season inelna hrang hrangah match 39 khelin goal 16-a khung a, assist vawi 13-a nei bawk.

Kum 28 mi Oliveira hian tun season-ah match 40 khela goal 19 khungin assist vawi sarih a nei a, Taremi nena an lo kir leh ta hi Porto tan chuan lawm avanga zuanpui tham a ni.

Porto coach Sergio Conceicao-a'n Chelsea lakah chak a tum tih pholangin an league match hnuhnung berah Moussa Marega a dah ṭha a, kum 29 mi striker hian Chelsea lakah goal khung a tum dawn.