Conte nauten champion zia an chhuah
Inter Milan tan Serie A nomawi a hnai zel a, an chesual viau a nih ngawt loh chuan Antonio Conte enkawl team hian champion lai Juventus kut aṭangin 'Scudetto' an chhuhsak ngei dawn.
Pathianni zan inkhelah Inter hian Matteo Darmian-a goal khat hmangin an mikhual Cagliari 1-0 in an hneh. Inkhel dangah Juventus chuan Genoa 3-1 in an hneh ve bawk - Old Lady leh Inter inkarah hian point 12 zet a awm.
Champion zia
League champion ni tur chuan season tluana khelh ṭhat a ngai. Squad neih chhah a ngai a, khelh ṭhat tawk loh niah pawh harsa leh vannei taka point hlawh chhuah a pawimawh ṭhin, heng zawng zawng hi Inter hian an nei mek.
San Siro a inkhelah Inter lamin ball chang tamin hun ṭha insiam nual mah se goal an khung hleithei lo. Striker palian Romelu Lukaku leh bench aṭanga rawn lut Lautaro Martínez ten hun ṭha an hlah a, forward Alexis Sanchez a vannei thei bik lo.
Goal a lut dawn lo niin a lang hman, hun tawp hma minute 14 chauh awm tawhah Manchester United defender hlui Matteo Darmian chuan Achraf Hakim hnen aṭanga a ball hmuh chu a khung a, goal dang lut zui loin point thum hmuh nan an hmang.
Hun pawimawh
Italian football hi hun rei tak chhung chu Juventus kutah a awm, tun hnai season kua phei chu Turin club hian league title an la vek. 2009-10 season hnua a vawi khat nan Inter hian champion an beisei ve leh mek a ni.
Inter Milan coach Conte chuan, "Inter ka zawm chhan hi thil tam tak a awm, chung zinga lian tak chu champion a ni. Kei chu team ṭhasa leh champion tur chiangsa enkawl ka ni ngai lem lo.
"Chona hmachhawn hi ka nuam tih zawng a ni a, hlawhtlinna chang ngei turin team din hi ka nuamtih leh tuina a ni. Tunah hian season hun pawimawh zual lai kan tawng mek, chesual loa kal tlang theih a pawimawh ang," a ti.
Juve an chak
An tan nomawi humhim beiseina a tlem tawh, chutih rualin Juventus hi an la beidawng duh bik lo. Andrea Pirlo naute hian Dejan Kulusevski, Alvaro Morata leh Weston McKennie te goal khat ṭheuh hmangin an mikhual Genoa 3-1 in an hneh.
Bianconeri hian an match hnuhnung zawkah Napoli an hneh a, tun ṭumah hian hrileng vangin Leonardo Bonucci leh Federico Bernardeschi te la chhawr thei lo mah se buaina lian tham an tawk lo, season thara Champions League khel phak zinga awm ngei an tum ang.
Old Lady manager Pirlo chuan, "Rilru pek tawk loh vangin goal khat kan chhuah, a bak chu sawisel tur awm lo khawpin kan khel ṭha. Rilru put hmang dik tak nen khelmual kan lut a nih hi chuan ṭha takin kan khel zel," tiin a sawi.
