Atletico-in point 2 an hloh, La Liga a ‘hot’

Real Madrid tan chanchin lawmawm a thleng leh ta - Pathianni zan khan Real Betis chuan La Liga hmahruaitu Atletico Madrid chu 1-1 in an chelh a, Real tan champion beiseina a sang sawt.

Atletico Madrid tan Yannick Carrasco chuan minute ngana lekah goal hmahruai khung mah se mualneitu Betis tan Cristian Tello chuan minute 15 hnuah si phurh a sut a, hun tawp thlengin goal dang a lut lo. Diego Simeone nauten hnehna chang zo lo mah se hma an hruai chhunzawm zel a, mahse, pahnihna Real nena an inkarah point khat chauh a awm tawh thung.

Pathumna Barcelona chuan point hnihin Atletico hi an thlau a, Barca leh Atletico hi la inhmachhawn leh tur an nih bawk avangin Real chu champion tura dinhmun ṭha ber ang hiala sawi theih an ni ta - La Liga inhum boruak a 'hot' thar hle.

A goal hma
Betis khelmualah Atletico an tlangnel a, minute ngana lekah goal an khung nghal - Yannick Carrasco chuan Betis defending buai karah ball chang fuhin goal ruakah a khung a, goal engzat tak khung belh ang maw? tih chu zawhna a ni.

Mahse, Atletico fan-ten an beisei ang ngawtin goal an hmu nawn lo - minute 15-a liam a, Betis lamin goal an khung ta zawk. Álex Moreno chuan Atletico goal-ah ball a thlawh lut a, Tello chuan harsatna nei loin goal-ah a lo chantir.

Kum 29 mi Tello hi Spanish rawlthar beiseiawm, tia an sawi ṭhin kha a ni a, Barcelona aṭanga lar chhuakin Catalan club-ah hian 2010-2014 thleng a khel. Barca tan match 86-ah goal 20 khungsak mah se a career ṭantira an beisei ang erawh a phak lo.

Fiorentina leh Porto-ah te loan-a a khelh hnuin Betis hi 2017 khan a zawm. Barca tan a khel tawh lo chungin a team tana goal khungin Catalan club tan thil ṭha a tihsak a, nomawi inchuh boruak a 'hot' lehzual.

Atletico an vanduai?
Betis khelmualah Atletico hi an vanneih ṭum ni se hnehna chang thei an ni - mahse, Barcelona leh Manchester City keeper hlui Claudio Bravo chet ṭhat zan an tawng tlat.

Angel Correa chuan hun pek belhah goal khung theihna remchang vawi hnih ngawt a ngei a, Bravo hian ṭha zetin a dansak ve ve - Correa chance ṭha neih dang chu Alex Moreno chuan goal line aṭangin a pet chhuak hman bawk. Hetih rual hian Betis chance neih chu sawi bo theih a ni bik lo. Atletico-in goalkeeper Jan Oblak an neih chu him nan an hmang a, Emerson leh substitute Diego Lainez-te hun ṭha chu Oblak hian a dansak.

Atletico hi an league match hnuhnung paliah vawi thum chu an chak zo ta lo a, inelna hrang hranga an match hnuhnung 11-ah vawi thum chiah an chak - January thla tawpa point 10-a sang fal team hi an dinhmun a him ta lo hle.

Atletico buaina
Betis an hmachhawn hmain Atletico hian buaina an nei sa - tun season La Liga-a an goal khung 55% khungtu Marcos Llorente leh Luis Suárez chu yellow card hmuh tam vangin an inlan thei lo a, Suarez hi a inhliam hrim hrim bawk.

Llorente hian tun season La Liga-ah match 29 khela goal kua khungin assist vawi riat a nei a, Suarez hian match 26-ah goal 19 khungin assist vawi hnih a nei thung - player pahnih tel loin Atletico an hriam tawk lo. Suarez hi April thla chhung chu hliam vangin a inlan thei dawn lo nia sawi a ni a, La Liga nomawi inchuh boruak san laia Uruguayan striker inlan thei lo tur hi Atletico tan chuan channa a ni.

Atletico hian January-a loan-a an lak Moussa Dembélé chu March 23-a training-naa a tluk hnuin an la chhawr leh lo bawk a, Betis lakah hliam vangin Joao Felix leh Kieran Tripper-te lakchhuah an ngai bawk - he harsatna aṭanga talchhuah an tum dan tur hi hmuh châkawm a tling.

Enge thleng chu kan hre zel ang chu. Eng team pawhin hun duhawm lo tawn lai chu an nei vek a, kan result chhia chu zanin result-ah hian a tawp tawh turah ka beisei a ni. Madrid leh Barcelona-ten ngai an awh chhoh laiin nghet takin season kan hmang reng a, eng nge thleng chu kan hre zel ang chu. - Diego Simeone, Atletico Madrid manager