Premier League : Champions League khelh inchuh boruak a sang

Premier League-in Champions League-ah hmunruak pali an nei a, Manchester City tih lo chu Europe inelna sang bera inlan lo thei dinhmuna ding vek an ni.

Tun dinmunah hma-hruaitu Man City bakah Manchester United, Leices-ter City leh West Ham te chu a sang pali zingah an tel. Club lian dang Chelsea, Liverpool leh Tottenham Hotspur te sawi bo theih an la ni lo.

Foxes an chesual
Season liam ta khan Brendan Rodgers-a kaihhruai Leicester City-in hun rei zawk a sang pali zingah awm mah se Champions League khel turin an tling zo lo.

Liverpool manager hlui Rodgers hian an tihsual aṭanga an inzir thu sawi lang tawh nachungin an tlukna ngai bawka tlu thei dinhmunah an ding. Foxes an hneh loh ṭumin player pawimawh James Maddison, Hamza Choudhury leh Ayoze Perez te chu Covid-19 an bawhchhiat avangin an inlan thei lo.

Leicester-in 'point ruk inchuhna' inkhelah player pawimawh tel loh an tuar a, hun tawp dawna an khelh dan thlirin kim ṭhapin khel se chak thei an ni tih a chiang. Tunah erawh a pawi tur ang a pawi zo tawh a, an hmabak a harsa ṭalh dawn.

Season tawp lamah Man United, Chelsea leh Tottenham te nen an la inkhel dawn a, Hammers laka point an hmu lo hi an la ui tulh tulh ang.

Blues leh Reds
Chelsea leh Liverpool hi season ṭantirh lamah champion thei zinga sawi ni mah se season chawhnu a inher meuh chuan Champions League khel pha turin thapui an chhuah a ṭul tawh.

Blues leh Reds hi Cham-pions League-ah an la dam ve ve avangin European champion an nih chuan season tharah Europe inelna sang ber hi an khel thei dawn a, hei erawh innghahna chi a ni lo. Jurgen Klopp-a kaihhruai Liverpool phei chuan quarterfinal first leg-ah Real Madrid an hneh lo a, champion chu sawi loh semifinal thlen phak pawh a har dawn.

Thomas Tuchel-a hote hian match sarih khelh tur an la neihah hmahruaitu Manchester City leh an elpui West Ham leh Leiceser City te an la chhawn dawn a, an fixtures a ṭha thaw khatah a ngaih theih. Liverpool fixtures a la ṭha mah zawk. Reds hian an khelh tur hmabakah Manchester United chiah an chunga awm an tum dawn a, team dang an khelh turte erawh an hnuaia awm te vek an ni.

Man United an him?
Manchester United-in an elpui zinga mi Tottenham an hneh theih avangin hahdam zawkin Premier League khelh hmabak an khel thei dawn a, Europa League-ah an rilu an pe tam thei ang.

Chutihrualin Ole Gunnar Solskjaer-a hote hi an him han tih ngawt theih a ni lo. Man United hian an elpui Liverpool leh Leicester City te an la hmachhawn dawn a, match hnih khat an chak lo a nih chuan pressure an nei let lehnghal ang.

UCL khelh inchuhna : Hmunruak pathum a awm
Man United (Pld - 31, Pts - 63)
Apr 18 Burnley (H)
Apr 25 Leeds United (A)
May 1 Liverpool (H)
May 8 Aston Villa (A)
May 11 Leicester City (H)
May 15 Fulham (H)
May 23 Wolves (A)

Leicester City (Pld - 31, Pts - 56)
Apr 17 West Brom (H)
Apr 24 Crystal Palace (H)
May 1 Southampton (A)
May 8 Newcastle (H)
May 11 Man United (A)
May 15 Chelsea (A)
May 23 Tottenham (H)

West Ham (Pld - 31, Pts - 55)
Apr 17 Newcastle United (A)
Apr 24 Chelsea (H)
May 1 Burnley (A)
May 8 Everton (H)
May 11 Brighton & Hove Albion (A)
May 15 West Brom (A)
May 23 Southampton (H)

Chelsea (Pld - 31, Pts - 54)
Apr 20 Brighton & Hove Albion (H)
Apr 24 West Ham (A)
May 1 Fulham (H)
May 8 Manchester City (A)
May 12 Arsenal (H)
May 15 Leicester City (H)
May 23 Aston Villa (A)

Liverpool (Pld - 31, Pts - 52)
Apr 19 Leeds United (A)
Apr 24 Newcastle United (H)
May 1 Manchester United (A)
May 8 Southampton (A)
May 11 West Brom (H)
May 15 Burnley (A)
May 23 Crystal Palace (H)

Tottenham (Pld - 31, Pts - 49)
Apr 16 Everton (A)
Apr 21 Southampton (H)
May 1 Sheffield United (H)
May 8 Leeds United (A)
May 12 Wolves (H)
May 15 Aston Villa (H)
May 23 Leicester City (A)