A laia lam Jesse Lingard

West Ham United leh Leicester City inkhelh ṭuma a laia lam kha tu nge ni tih zawhna i dawng a nih chuan, a chhânna chu Jesse Lingard a ni e.

Manchester United aṭanga loan-a Hammers zawmtu Lingard hian a theihna tak a pho chhuah avangin London club pawhin Champions League khelh an beisei hial. Pathianni zan khan West Ham-in an chung chiaha awm Leicester City an mikhual a, 3-2 in an hneh. London Stadium-ah Lingard-a'n first half-ah goal hnih a khung a, Hammers tan match kua lek a khel chungin goal riat a khung der tawh.

Second half-ah Jarrod Bowen-a'n minute 48-naah West Ham tan a khung belh a, 3-0 in hma an hruai. Amaherawhchu Foxes-in tha an thlah duh lo a, Kelechi Iheanacho-a'n goal hnih khungin hun tawp thlengin point hmuh beiseina nei mah se an ṭang tlai hret. Lingard-a telna West Ham-in hnehna an chang.

A hming chu Lingard
Nikum kum tawp lamah kha chuan Jesse Lingard-a chanchin hian sawi a hlawh lo a, hemi hma lam leh deuh hi chuan social media lama fiamthu thawhna ber pakhat a ni. Kum 28 mi Lingard hian Man United tan season chawhma lamah khan match thumah chiah a inlan a, league-ah phei chuan a hmel hmuh tur a awm lo.

December 2018 aṭang daih tawh khan Lingard hian Premier League-ah goal khat chauh a khung a, England kawr pawh pawh kum 2019 aṭang khan a ha tawh lo. Amaherawhchu West Ham manager David Moyes-a'n a enkawl tawh Lingard a theihna a hria a, January thla khan loan hmangin a la chhuak.

Lingard hian match hmasa berah goal hnih a khung nghal a, 'tifuh' ṭawngkam la hman theih a ni. Mahse match tinah Lingard a langsar chho a, 'goal khat paia' tih theih khawpin goal hmaah a hriam. English midfielder hian Hammers tana match hnuhnung paliah goal a khung vek a, match hnuhnung parukah goal ruk a khung.

Social media lamah Lingard-a fakna a ri mawlh mawlh a, March thla tawpah chuan England tan match thum khelin bul a ṭanna inkhelah assist a nei hial. Hammers tana khelhpui Arthur Masuaku pawhin, "Messi hi Warrington-ah a piang tih ka lo hre lo reng reng," tiin Lingard a fak a, inhliam vanga inlan thei lo Declan Rice pawhin, "Dan theih a a ni lo," tiin a teammate chu a chhuang hle.

Lingard a ni tlat
Jesse Lingard hi Man United academy-ah Paul Pogba, Ravel Morrison leh Will Keane-te nen batch khat an ni a, 2010–11 FA Youth Cup champion team-ah pawh a langsar zingah a tel pha. Coach tam takin Lingard-a theihna sanzia hi an fak tawh ṭhin a, amaherawhchu khelmualah beisei a pha ṭhin lo.

Khelmuala a chet ṭhat loh avangin khelmual pawn lama chet dan, a incheina, social media-a a che vel leh nungchangte chuan sawisel a hlawh zui. Tunah erawh a ze ngai te tein 'celebrate' dan danglam tak takte rawn nei chho leh tawh mah se goal a khung miau avangin fak a hlawh tawh zawk.

Foxes nen an inkhelh ṭumah pawh hian Lingard-a'n ropui takin goal khatna a khung a, Vladimir Coufal ball pek chu mawi zetin a volley goal. English midfielder chevel chu hmuhnawm a tling pha a, West Ham chakna kawnga player pawimawh a ni.

Hammer manager David Moyes chuan, "Jesse theihna hi hre mah ila keini pawhin mak kan ti. A goal khung hian beiseina min siam a ni," tiin Lingard vanga team-in phur tharna a neih thu a sawi. Lingard chuan, "Ka inringtawk a, tun dinhmunah hi chuan ka hriam ve hle. Ka ṭhianten ball min pekna tur ka hria a, nuam pawh ka ti. Cup final ang mai a ni," a ti.

Lingard hian February aṭangin tun season Premier League a khel ṭan ve chauh a, chuti chung chuan player langsar Sadio Mane (7), Richarlison (6), Jack Grealish (6), Phil Foden (6), Mason Mount (6), Roberto Firmino (6), James Rodriguez (6), Timo Werner (5), Kevin De Bruyne (5) leh Nicolas Pepe (5) te aiin goal a khung tam zawk.