United-in phuba lain Spurs an hneh

October, 2020-ah Manchester United-in Old Trafford-ah Tottenham Hotspur an mikhual a, mikhual hi 6-1 in an chak. United-in phuba an la a, Pathianni zan khan Ole Gunnar Solskjaer-a hote hian Jose Mourinho hote chu khual-mualah 3-1 in an hneh.

Tottenham Hotspur Stadium-a inkhelah mikhual team tana Edinson Cavani goal khung chu sawi zui hlawh takin pawm loh a ni a, first half-ah Spurs-in Son Heung-min-a goal hmangin hma an hruai zui. Second half-ah Man United an insiamṭha a; Fred, Cavani leh substitute Mason Greenwood te goal hmangin an lehthal.

United-in match 31 aṭangin point 63 an hmu a, Leicester City-in West Ham laka point an hloh avangin Foxes lakah point sarihin sang fal a, pahnihnaah an insawh nghet.

A goal lo maw?
First half-ah United-in goal an khung a, pawm a ni lo thung - Scott McTominay-a'n amah chuhtu Son Heung-min tlan pelin Fred a pe a, Brazilian midfielder hian Paul Pogba pe lehin French midfielder hian Serge Aurier kap karah a thawlh lut. Cavani a rawn dawk zawk a, Uruguayan forward hian chiang takin a pet goal.

Amaherawhchu, VAR hmangin thil thleng hi enlet a ni a, Tominay-a kut vaiin Son-a hmai a khawih fuh avangin referee Chris Kavanagh-a'n goal-ah a pawmsak lo. Referee hian ṭan chhan nei bawk mah se football expert lam chuan United goal an pawmsak lo hi mak an ti.

Ole chuan, "Son kha ka fapa chu ni se khatianga thil ho taka let tawp tawpa tâla min tihzah avangin chaw a nghei ang," tiin a sawi a, tlu derah a puh a ni ber.

Jose Mourinho erawhin a fa chuam hi a chhan thung a, "Ole aia pa ṭha zawk a neih avangin Sonny hi a vannei ka ti. Pa ka nihna aṭangin teh ta ila eng pawh ti se chaw an nghei lo ang. A ṭul a nih chuan fate tan ruk pawh ka ru mai ang. A thusawi avanga ka lungawi loh thu Ole hi ka hrilh," a ti.

A goal ta e
Tottenham zawkin goal an khung hmasa ta a, minute 40-naah Harry Kane-a pass chu Victor Lindelof-a'n a dan ṭhelh zarah Lucas Moura-a'n fing takin Son-a tan a pe a, South Korean star hian chiang zetin a pet goal. Spurs-in halftime-ah goal khatin hma an hruai.

Second half erawh United ta a ni - United goal bawh a na a, Mourinho-a'n tlarhnungah player rem tam mah se Solskjaer-a hoten passing hmangin an ṭhiat.

Minute 57-naah Fred, Bruno Fernandes leh Marcus Rashford ten Spurs tlarhnung an ṭhiat a, Cavani-a ball pet chu keeper Hugo Lloris-a'n dang mah se a per chu Fred-a'n hnai tak aṭangin a khung.

French keeper Lloris hian Fernandes-a goal khung tur ṭha tak a dang zui a, amaherawhchu Cavani erawh a dang thei lo. Bench aṭanga rawn lut Mason Greenwood chu danglamna a ni a, minute 79-naah English rawlthar hian rang taka cross-in Cavani-a'n dive chungin a tauh lut.

United tlarhnung a phui bik lo a, Spurs-in an nawr let avangin goal chhuah thei dinhmunah an ding ve deuh reng a, Son-a'n uiawm taka a pet goal loh hnuah Cavani-a'n goal tur a danna lamah anmahni goal ban a tauh per a, United an him hram.

Injury time-ah Paul Pogba-a'n a thiam thil a pholang a, Mason Greenwood pe lehin English rawlthar hian a ke ding lamin kawh zetin a pet goal. Chak phu zawk Man United 3-1 in an chak.

Engtin zel?
Solskjaer-a'n Dean Henderson bul a ṭantir a, English keeper hi a khelh ṭhat avangin David de Gea tan first keeper nih a harsa tawh dawn. Henderson hian Old Trafford-ah hmun nghet a chang thei a nih chuan England no. 1 nih a hnai sawt ang.

Man United hian April 15, Ningani zan hian Europa League-ah Granada an mikhual zui dawn a, Pathianni result avangin an phur hle ang. Greenwood leh Cavani-te an khelh ṭhat avangin tlarhma lam buaina an chingfelah a ngaih theih a, chutih rualin season tawp lamah fixtures a tawt avangin Solskjaer hi player thlan kawngah a fimkhur a ṭul ang.

United fans duh chu Champions League khelh phak ringawt a ni tawh lo a, tuna an la damna Europa League champion nomawi lak ngei a ni ang.