Zaninah Pro Fight Final

Tualchhung boxing inelna ngaihhlut Yodha 4x4 Pickup LPS Pro Fight chu zanin hian R. Dengṭhuama Indoor Stadium, Mualpuiah final khelh a ni dawn a, dar 8:00 aṭangin inhnek ṭan a ni dawn - fight pali a awm ang.

Lightfly, bantam, light leh lightheavy final khelh tur a ni dawn a, middle champion lai a inlan loh avangin final lut pahnih ten March 12, Thawhlehni zanah 'Title Fight' an nei nghal dawn. Zanin hian final bakah naupang tan KT Enterprise Exhibition Fight pahnih a awm bawk dawn a ni.

Lightfly

F. Zoramchhana'n a zawna Title Fight vawi hnih khelh a tum a, a hmaa ding tur hi Lallawmawma a ni. Cherhlun tlangval hian semifinal-ah Arunachal Pradesh boxer Heli Tana Tara hneh hramin a chak danah inhnialna a awm zui hle a, Tuipui rawlthar Lawma hmaah fiahna a hmachhawn ang.

Cherhlun chhuanvawr Zotea hian Pro Fight hnuhnung ber 2017 champion lai NT Lalbiakkima a hneh lo. A khingpui tur Lawma hi kum 16 mi chauh la ni mah se, Tuipui boxer hian a khelh tawh chinah hnehsawh takin hnehna a chang ṭhin, inrintawkna a nei sang dawn.

Bantam

HC Lalramfela'n 2015 khan title a la a, inelna hnuhnung berah a hloh. Chawngtlai fachuam Ramfela hian Tuipui boxer Laldingliana a hneh thei a nih chuan a zawna a vawi li nan Title Fight a khel thei dawn a ni. Boxing thiam khua tia hriat lar Tuipui boxer Dingliana tan erawh hnehna a chang a nih pawhin Title Fight a vawi khat khelhna tur chauh a ni dawn.

Ramfela hian tawnhriat a ngah tawh a, zaninah pawh chak tura rinkai a ni. Mahse, Dingliana hi a ban a sei ṭha a, a ban phak aṭanga a vei leh ding a hnek chhuah zawn a hlauhawm thei hle. Final match zingah a hmuhnawm zual tur zinga ngaih a ni.

Light

Sete Boxing Academy zirlai pahnih Vanlalawmpuia leh Zomuansanga ten light final an khel dawn. Boxer pahnih hian an ṭhatna leh ṭhat tawk lohna an inhre chiang. Ṭhiandun ni mah se boxing ring chhungah erawh zanin atan chuan hmelma an ni dawn.

Veikhawr leh sanghet ṭha tak Muantea'n final kalkawngah hautak leh harsa khawp inhnek a hmachhawn lo. A theihna chiang zawkin fiah a ni dawn a, Khatla South fighter hian Awmpuia kut ding lam awpbeta a kuttum vei lam hlauhawm taka a hmang thei a nih chuan hnehna kawng a inhawng. Chutihrualin tharum ngah Awmpuia hi awlsam taka nuai liam chi a ni dawn lo.

Lightheavy

Palian inhnek hi mipuiin an hlut ṭhin a, ṭum dang ang bawkin kuminah pawh a hmuhnawm. Pumraw lian leh tawnhriat ngah zawk Jack Lalsangliana chuan inrintawkna sang tak nen hruihrual chhuang a lut dawn, a khingpui tur DK Munga tan fimkhur a ṭul dawn.

Kum 25 mi Sangliana hi Mizoram mixed martial art middleweight champion lai a ni a, infiamna chi hrang pahnihah champion kawp tumin a bei mek. Semifinal-ah awlsam takin Hmingchungnunga a hnek tlu a, round khat a khel zo lo.

Semifinal lehlamah Hrianghmun boxer Munga'n amah aia kg 17-a rit Vanlalchhuanga a hneh ve thung a, hah leh chau takin round nga an inbei. Final atan inbuatsaihna ṭha tak a ni thei. Munga tan a tir lama inven fimkhur a fuh a rinawm a, rei tak an inhnek a nih chuan a tawp lamah a thahrui feina a hmang thei tura ngaih a ni.