Mangṭha Real - I hun a her liam ta?

Real Madrid-in kar khat chhung lekin Copa del Rey, La Liga leh Champions League nomawi an beiseina a tawp vek a, hmanni lawka team ropui Real Madrid kha an thamral mek.

Thawhlehni zan khan Real hian Champions League last 16-ah Ajax chu 1-4 ngawtin an ngam lo a, ni 1,011 chhung ngawt European champion an nihna chu a tawp zui. Real hian kum 2016 khan Champions League final-ah Atletico Madrid an hneh a, Milan khawpuiah nomawi chawiin an champion.

Madrid khaw club hi hemi hnu hian Champions League aṭangin an tla leh tawh lo - season thum chhung a zawnin an champion a, tunah erawh ui tak chungin 'Mangṭha' an tih a ṭul.

Min hrilh leh rawh
Real fan-ten tun atan chuan, "Sawi nawn leh rawh, min hrilh leh rawh," tih bak sawi theih an nei rih lo a, 'tun hunah' beisei tur an neih tawh loh miau avangin thawnthu hlui chu an tan ngaihnawm ber a ni rih.

Ajax-in Real an ngam chiah khan May 2015 hnua Champions League aṭanga Real petchhuah an nih hmasa ber a ni a, thla 46 chhung zet chu Real hian nuamti takin Europe-ah ro an rel tihna a ni. Kum 2015 hnu lam khan Real hian Champions League-ah match 47 khelin vawi 32 an chak a, vawi sarih chiah an tlawm - hetih chhunga an goal khung zat hi goal 112 a ni a, an lamah goal 50 a lut.

Heti taka team hlauhawm leh ṭha hi engtinnge an tlakchhiat thut theih, tih chu zawhna awm a ni zui a, a chhanna erawh tawi fel takin a awm - 'Cristiano Ronaldo' tih hi a ni.

Ngaihlai Ronaldo
Champions League last 16 aṭanga Real an tlak hnuhnung ber chu kum 2010 daih tawh kha a ni a, Ronaldo-a'n Madrid khawpuia season a hman hmasak ber a ni - hemi hnuah erawh semifinal aia hniam an thleng leh tawh ngai lo.

2015-16 season hnu lamah Real tana Champions League-a goal khung hnem ber chu Ronaldo niin goal 43 a khung a, amah hnaih bertu Karim Benzema chuan goal 18 a khung - an inthlau hle. Tun season Champions League-a Real Madrid tana goal khung hnem ber chu Benzema a ni a, goal li chiah a la khung - he player hi, "Ronaldo tan ka khel ṭhin a, tunah chuan hruaitu ka ni ta," tia sawitu kha a ni.

Real midfielder Luka Modric chuan, "Ronaldo an chan chuan eng team pawhin an tuar ang. A hmun ruak hnawhkhah hi thil theih loh deuhthaw a ni," tiin a lo sawi tawh a, a thusawi dikna a lang zel.

Lung a awi thei lo
Real-in Ajax an ngam loh rualin Spanish media-te lung a awi thei ngang lo a, manager Santiago Solari, president Florentino Perez leh player engemaw zat chhuah turin an ziak chuai chuai.

Spanish chanchinbu lar Marca chuan, "Thawnthu ropui hnutchhiahtu te kha tah hian an zal ta: Thleng leh thei tawh lo tur khawp thil ropui chu zahthlak takin a tawp," an ti a, mitthi ang maiin Real an thlah liam. El Pais chuan, "Madrid-in an hloh vek ta," tiin an ziak a, AS chuan, "Kar lungchhiatthlak," tiin Real kar duhawm lo chu an tarlang bawk.

Spanish chanchinbu lian hoin an ziah uar ber chu Real tlakchhiat thu leh engtinnge an indinthar ang tih a ni a, chhanna inpe thei an awm bik lo.

Zidane an bia
Ronaldo koh kir a theih tawh lo a, tun dinhmuna Real lunglentu ber chu season thum chhung a zawna Champions League nomawi chawipuitu Zinedine Zidane a ni.

Real president hlui Ramon Calderon chuan Real hian Zidane hi neihlet duhin an be leh tawh niin a sawi. Calderon chuan, "Club president Florentino Perez chuan Zidane hi lokir leh mai turin phone-in a bia a, mahse Zidane hian a pha a ni. "French manager hi June-ah erawh a rawn kir leh mai thei," a ti a, tun atan erawh Zidane hian kir tumna a nei lo.

Zidane hian Real a enkawl chhung khan nomawi chawi theih zawng zawng a chawi kim vek a, Bob Paisley leh Carlo Ancelotti te nen Champions League nomawi pathum chawi thei awmchhun an ni.