All England-ah Sindhu tla nghal

Badminton inelna ngaihhlut All England Open Badminton Championship-ah India tana medal lak beiseina pakhat PV Sindhu chuan beisei ang result a nei thei lo a, seeded pangana Sindhu hi Sung Ji-Hyun hneh loin a tla nghal.

Indian shuttler langsar dang Saina Nehwal, Kidambi Srikanth leh B. Sai Praneeth te erawhin second round an in vaw kai, season 18 chhung Indian shuttler ten nomawi an chawi theih tawh lohna hmuna hlawhtlinna chan chu a awlsam dawn lo niin a lang.

Hmeichhe singles
Nilainia inkhelah Sindhu hian match point hmasa vawi kua ngawt inchhanhim thei mah se a tawpah a ṭang zo lo, seeded pawh chang phak lo Ji-Hyun nen darkar khat leh minute 20 an inkhelh hnuah 16-21, 22-20, 18-21 in a chak lo a ni.

Rio Olympic silver medalist Sindhu chuan, "Ka tan ni ṭha a ni lo, na taka ka vuak kha line pawna a kal loh pawhin net-ah a tang leh mai ṭhin. Game pathumah khan a tir lamah ka hnufual vek a, point an hmuh san fal tawh chuan pawh thlak leh hi a harsa tawh ṭhin a ni.

"A nihna takah chuan inelna hmachhawn tur hian training ka nei ṭha tawk a, inkhel hautak leh harsa takah hi chuan beisei ang result a thlen loh chang hi a awm ve thei a ni. Ka chak lohna hi nakina rilru paukhauhna min siamsaktu ni se, ṭha zawka ka rawn let leh theih nan chona a ni ang," tiin a sawi.

World number 1 hlui Saina erawhin Scotland nula Kirsty Gilmour chu 21-17, 21-18 in a hneh. London Olympic bronze medal latu Saina hian match lehpekah chuan Line Hojmark Kjaersfeldt a hmachhawn ang.

Kum 28 mi Saina chuan, "Seper Series inelna dang kan hmachhawn ai mahin All Eng­land hian ngaihhlut a hlawh ṭhin a, ṭha taka bul ka ṭan thei hi ka lawm hle. Player tinin nomawi chawi an duh vek a, kei pawhin ka duh. Nuamti takin ka khelh dan phung pangngaia khelh theih a pawimawh dawn a ni," a ti.

Mipa lam
Indian shuttler zinga singles title la thei tura ngaih Srikanth chuan a match hmasa berah harsatna liantham a tawk lo, a khingpui Brice Leverdez chu 21-13, 21-11 in a hneh. Srikanth hian second round-ah chuan Indonesian tlangval Jonatan Christie a bi tum leh ang.

BWF World Tour Super 1000 inkhel dangah Sameer Verma chuan seeded parukna Viktor Axelsen lakah game hmasa ber la mah se, India tlangval hi a game hnuhnung pahnihah a chet fuh tawk loh avangin 16-21, 21-18, 21-14 in a chak lo zawk a ni.

First round inkhel dangah India tlangval pahnih an inhmachhawn nghal a, 2017 Singapore Open champion B. Sai Praneeth chuan HS Prannoy 21-19 21-19 a hnehin second round a in vaw kai ve bawk.

All England inelna ni hmasa berah hian beisei loh result lian tak mai dang hmuh tur a awm. Olympic champion ni tawh Lin Dan a tlawm nghal. Chinese legend hi Japanese rawlthar Kanta Tsuneyame lakah 19-21, 21-14, 21-7 in a chak lo nghal a ni.