Paris-ah thilmak a thleng

Manchester United chu Old Trafford-a 0-2 a an hneh loh Paris Saint Germain hmachhawn turin first team player 10 an chhawr thei lo chungin Parc des Princes-ah an leng lut a, thil mak an thlentir.

Paris khawpuiah Ole Gunnar Solskjaer hote 3-1 in an chak a, 'away goal rule' hmangin hnehna an chang. Champions League leh European Cup history-ah first leg-a mahni muala 0-2 a chak lo club 106-in stage sang zawk an thleng thei lo a, 107-naah United-in history an thlak danglam.

Beiseiawm lo beiseitu?
Vanglaini-in inkhel tur a thlir lawknaah, "Solsjkaer hote hian kim thlap pawhin PSG hmachhawn se tho chhuak tura rin an ni lo a, an dinhmun khaikhawmna tawi fel ber chu 'beisei bo' tih a ni," tiin a ziak a, hei hi football khawvel hmuh dan pawh a ni.

A chhan chu, PSG hian an match hnuhnung pariat an chak vek a, Ligue 1-ah point 71 an hmu a, French top flight football-ah match 26 aṭanga point sang ber an ni a. United erawh an mualah 0-2 a an chak loh bakah Paul Pogba chu hrem a ni a; Anthony Martial, Jesse Lingard, Juan Mata, Ander Herrera, Nemanja Matic, Alexis Sanchez, Antonio Valencia, Phil Jones leh Matteo Darmian te an khel thei lo.

Heti chung hian Norwegian manager Solskjaer chuan 'comeback' a inbeisei tlat a, ani hi United history-a comeback ropui ber ang hiala chhal ngam thlentirtu a ni. 1999 Champions League final-ah United hian Bayern laka 1-0 a an hnufual hnuin injury time-ah goal hnihin an chhang let a, Solskjaer hi chakna goal khungtu a ni.

Ring la, chhandam i ni ang
United-in beisei bo an beisei satliah lo a, an ring a, vanneihnain a zui bawk. Minute hnihna lekah PSG defender Thilo Kehrer back pass chu Romelu Lukaku chuan a tlan chakna leh tharum hmangin goal khung nan a hmang.

Hemi hnu lawk hian offside thlangkama (offside trap) awh fuh loh Kylian Mbappe ball pek chu vengtu nei lo Juan Bernat-a'n chiang zetin minute 12-naah a khung.

United-in vanneihna an keng tel a, box pawn aṭanga Marcus Rashford-a ball pet chu veteran keeper Gianluigi Buffon-a'n tiperin Lukaku chuan nang fuh hmasa berin Belgian striker hian a goal hnih nan a khung.

Inhliam ngah vanga Solskjaer-a'n right back-a a dah lailawk Eric Bailly chu PSG tlar hma lakah a tâl buai a, hliam vangin Diogo Dalot-a'n minute 35-naah a thlak a, an khelh chin thlirin United tan chanchin lawmawm zawk a tling.

PSG tlar hmaah Angel Di Maria leh Mbappe-te hlauhawm mah se a hmáwr an báwk thei lo a, a tawp thlengin beisei an neih phah. Injury time-ah substitute Dalot-a ball pet 'risk' chuan Old Trafford-a goal khungtu Presnel Kimpembe kut a per a, referee-in VAR a ràwn hnuah penalty a pe.

Paul Pogba a awm loh avangin kum 25 mi Lukaku tan hattrick siamna remchang a ni a, amaherawhchu Belgian striker aiah Marcus Rashford rawn pên chhuakin United tana a penalty pet hmasa ber chu PSG lama goal pawimawh khung nan a hmang. French club keeper Buffon-a'n Champions League a khelh hmasak berin kum 21 mi Rashford hi a la piang lo.

Man Utd nge nge
United manager Solskjaer chuan, "A ropui tak zet. Ka naute chungah rinna kan nghat a, ka beisei tlat. Bul kan ṭan ṭha a, goal khung hmasak kan tum a, khatianga hma kha chuan kan beisei lo. A tawpa penalty pet dawn kha chuan hlauhthawnna ka nei a, Molde ka enkawl laia Champions League inkhela Basel kan hmachhawn ṭumin ka player-in a hlah a, kan tla. Rashford kha kum 21 mi chauh a ni a, pressure nasa tak a awm chungin hlauhthawnna reng a nei lo. Amah leh Lukaku kha an khel ṭha takzet a ni.

"Champions League-ah chuan inlehthalna hi a thleng ṭhin. Real leh Ajax kha team inhmuhkhawmnaah pawh kan sawi nasa. Nikum khan Real leh Juventus inkhel te, PSG leh Barca inkhelah te inlehthalna a thleng. Kan club tih dan ṭhin pawh a ni. Man Utd kan ni tlat," tiin inkhel chungchang a sawi.

Solskjaer hian player inhliam tam chu remchangah hmangin reserve team zinga mi Tahith Chong leh Mason Greenwood te hun tawp lamah a luhtir a, an luhlai hian English club hi tla thei dinhmunah an la ding.

Man United hian Pathianni zan dar 10:00-ah Arsenal an hmachhawn nghal dawn a, Premier League inkhel hi season thara Champions League khel tur zawnna a nih theih avangin a pawimawh ang.