Chak mamawh Arsenal mualah Man United
Premier League aṭanga Champions League khelh tum Arsenal leh Manchester United te chu Pathianni zan dar 10:00 hian Emirates Stadium-ah an intawng dawn a, UCL ticket an chuhpui pakhat Chelsea pawhin Wolves an mikhual ang.
Manchester United hi Paris Saint-Germain laka chak hlim an nih avangin an phur vanglai a ni. Gunners erawh Rennes muala tlawm hlim an ni thung, team pahnih hi France khawpuia zinchhuak ve ve ni mah se Unai Emery naute hian ni khatin chawlhna hun an neih tlem avangin an hmabak a hautak dawn.
Emirates-ah Gunners
Unai Emery nauten khualmualah result an nei ṭha tawk lo a, Europa League last 32-ah pawh BATE an hneh let. Rennes an ngam loh hnuah pawh Emery chuan, "Emirates Stadium-ah kan khel leh dawn a, fans puihna nen kan tho chhuak leh ang," tiin an khelmual an hman thiam thu a sawi.
Arsenal hian an khelmuala Premier League match 14 an khelh hnuhnung 14-ah chak loh an nei lo a, vawi hnih an khingpuite nen an inhnehtawk; match riat chhung an chak zawn mek - league bakah European football-ah pawh an mual an hmangthiam.
Mahse, Ole Gunnar Solskjaer-a naute hian FA Cup-ah Gunners hi an mualah 3-1 in an luhchhuah tawh, manager lailawk Solskjaer kaihhruaina hnuaia league match 13 aṭanga vawi 11 chak thei hi inrintawkna sang tak nen an lenglut dawn.
Point khat
Tuna EPL table awm ang hian season khar ni se a zawna a season thum nan Arsenal-in UCL an khel phak dawn lo tihna a ni. Mahse, an chunga awm Man United an phak lohna hi point khat chauh a ni a, an hneh a nih chuan point hnihin an kalsan ang.
United tan pawh Arsenal kalsan theihna remchang a ni ve tho a, an chak lo a nih erawh chuan hna a hautak tawh ang. Gunners bakah hian Manchester City leh Chelsea an hmachhawn leh a la ngai dawn a, an league match hnuhnung pariatah tun dinhmuna a sang chin paruk an la hmachhawn dawn a ni.
North London club hian United an hmachhawn zawh hi chuan an hna a awlsam deuh dawn niin a lang. A sang zual 10 zinga pahnih chiah an hmachhawn tawh dawn a, pasarihna luahtu Wolves chu dinhmun sang ber an ni dawn. Season tawp lamah chuan a hniam lama awm hmachhawn a awlsam ngai lo tih erawh hriat tel a ṭha ang.
Hahchawl pahnih
Hrem vangin Arsenal striker Alexandre Lacazette chu Europa League-ah chhawr a ni lo a, Manchester United midfielder Paul Pogba pawh hrem vang bawkin UCL last 16-ah a inlan bik lo - France international pahnih hi zaninah an inlan ang.
Lyon striker hlui Lacazette hi an league match hnuhnung bera Tottenham an hmachhawn ṭumin maltlattir a ni a, a hun ṭha neih ṭum hnih a hlah. Amah ang bawka Spurs laka chakna goal khung theihna 'penalty' hlahtu Pierre-Emerick Aubameyang nen United lakah goal an khung a pawimawh tawh dawn.
Jose Mourinho hnuaia beisei phak lo Paul Pogba chu Solskjaer hnuaiah a par chhuak mek a, Juventus midfielder hlui hi khelmual chhungah 'hotupa' a nih bakah, goal khungtu leh a khung tur siamsaktu a ni bawk - United midfield lailum luahtu hi Arsenal tana ven ngun ngai bik tur a ni.
Wolves mualah Blues
Eden Hazard leh Gonzalo Higuain te hahchawlhtir chungin Chelsea-in an mikhual Dynamo Kiev 3-0 in an sawp thei a, Maurizio Sarri naute hian Wolves an hmachhawn hunah an ralthuam ṭha pahnih hi an phawrh ang.
League Cup final-a thlak duh lotu Kepa Arrizabalaga-a'n hremna hmachhawn mah se a dinhmun ngai a luah leh tawh a, zaninah pawh si ban a nghak ngeiin a rinawm.
EPL table-a parukna ni lai Chelsea hian an chunga awm Manchester United leh Arsenal te aiin point khatin an khel tlem zawk. Wolves hnua Everton an lenchilh hnuah Gunners leh United an awl dawn - Italian manager Sarri naute tan a zawna point thum hmuh hun ṭha a ni.