Chelsea dinhmun a ṭha tawh

Ningani zan Europa League last 16 first leg inkhelah Chelsea chuan an mikhual Dynamo Kiev 3-0 in an sawp a, Maurizio Sarri naute hian an ke ding lamin quarterfinal an rap tawh.

Premier League club lian dang Arsenal erawh Rennes khelmualah 3-1 in an mualpho a, Gunners manager Unai Emery chuan March 14 zana second leg an khelh hunah an thawhchhuah leh theih ngei a rin thu a sawi chhuak.

Chelsea an ṭha
Stamford Bridge-a inkhelah Sarri-a'n match hnuhnung bera a luhtir aṭangin player paruk ngawt a siksawi, hetichung hian team khawng tak a la din thei.

Blues hian Champions League khel turin Europa League nomawi an mamawh avangin a ṭul thuta chhawr turin Eden Hazard, N'Golo Kante leh Gonzalo Higuain te chu bench-ah dah an ni.

Minute 17-na lekah Pedro chuan Olivier Giroud nena ball an inpek kual hnuah goalkeeper Boyko dan hman lohin an goal khatna a khung. Inkhel thununtu Blues lam hian second half-ah Willian hmangin an goal hnihna an khung, Brazil international hian yard 25-a hla aṭangin a pet goal.

Substitute Ruben Loftus-Cheek hnen aṭanga a ball hmuh chu rawlthar Callum Hudson-Odoi chuan tun season Europa League bika a goal thumna ni turin a khung bawk.

Keeper Kepa Arrizabalaga chuan league ang bawkin a dinhmun ngai a luah leh tawh a, Spanish keeper hian an mikhual team lakah hna hautak hmachhawn tur a nei lo.

Ukrainian club Dynamo Kiev hian England an tlawh tawh vawi 15-ah chak ni hmel an hmu thei lo a, an tan quarterfinal lut turin hna a hautak tawh dawn. Chelsea tan erawh tlang turin goal hnih aia tam lo chhuah loh a tawk ang.

Arsenal chak lo
French Ligue1 club hmachhawntu Arsenal in an striker Alexandre Lacazette an chhawr thei lo tih mai loh chu an ṭhat theih danin an khel thei.

Rennes khelmual Roazhon Park-ah mikhual Arsenal hi chefuh hmasa zawk an ni. Minute thumna lekah Alex Iwobi-a'n cross tum ni awm taka a ball pet chu a goal a, khualmuala goal khung Arsenal an phur. Mahse, chawlhlawk hma deuhin defender Sokratis Papastathopoulos chu yellow card pahnihna hmuh vangin hnawhchhuah a ni a, Greece international freekick chawi aṭangin Benjamin Bourigeaud chuan an siphurh a sut nghal.

Arsenal vanduai a kaltluang, defender Nacho Monrea chuan ball dan a tumna lamah anmahni goal-ah a khung palh a, hun tawp hma deuhin French club lamin Ismaila Sarr tauh luh hmangin an goal thumna an khung bawk.