Quarterfinal-ah Saina leh Srikanth

Badminton inelna ngaih­hlut All England Championship-ah Saina Nehwal leh Kidambi Srikanth te chuan quar­terfinal an inhlangkai a, Indian shuttler ten season 18 chhung nomawi an chawi theih tawh lohna hmuna champion an beiseina a la nung zel.

Ningani zan inkhelah Saina hian minute 51 chhungin Denmark nula Line Kjarsfeldt chu 8-21, 21-16, 21-13 in a hneh a, an intawn hnuhnung pahniha a hneh player lakah fiahna hautak a paltlang.

London Olympic bronze medalist Saina hian a match lehpekah chuan All England vawi hnih champion tawh Tai Tzu Ying a hmachhawn leh ang. 2015 hnu lamah Saina hian Tai hi vawi 12 ngawt a ngam lo tawh a, atan hna a awlsam dawn lo hle.

Mipa singles lamah seeded pasarihna Sri­kanth chuan Asian Games champion Jonatan Christie chu 21-17, 11-21, 21-12 in a hneh - In­donesian shuttler nen hian an intawn hnuhnung pathuma a vawi khat chakna chiah a ni.

Match hmasa bera Brice Leverdez hnehtu Srikanth a chak nawn avangin All England bikah chuan a vawi khat nan quarterfinal a khel dawn a, world number 1 Kento Momota nen an intawn leh dawn avangin ani tan pawh chetsual theihna a ni dawn.

Inkhel dangah Singa­pore Open champion B. Sai Praneeth a vanduai. World number 15 Angus Ng Ka Long nen an intawn hnuhnung pathuma a chak loh vekna ni turin 12-21, 17-21 in a tlawm a ni.