Zaninah I League champion a hriat dawn : AFC tan vawiinah league match hnuhnung ber

India rama club football inelna sang ber I League hmawr bawk a ni dawn ta a, club 11 inelna aṭangin match tawp ber a thlen dawn meuh chuan champion beisei pahnih chiah an awm ta.

Zanin dar 5:00-ah East Bengal leh Chennai City an inlan ve ve dawn a, club pahnih hi champion-a season khar thei dinhmunah an la ding ve ve - dinhmun ṭha zawk erawh Chennai City a ni.

East Bengal hian khualmualah Gokulam Kerala an lenchilh dawn a, Chennai City-in Minerva Punjab an mikhual thung ang.

Vawiin chawhnu dar 2:00-ah Aizawl FC chuan an league match hnuhnung ber an khel dawn bawk a, RG Stadium, Mualpuiah Churchill Brothers an mikhual ang.

Hmabak
Chennai City tan champion turin point thum hlawhchhuah a tawk a, East Bengal tan point thum hlawhchhuah piahlamah Chennai City-in point thum aia tlem an hmuh a ngai thung.

Team pahnih hian point hmuh zat inangin season khar ta se Chennai City hi champion tur zawk an ni ang - point in ang tur hian Chennai an chak loh a, East Bengal-in draw result an neih a ngai. Point a inzat a nih chuan head-to-head en tur a ni a, tun season-a vawi hnih an intawnah East Bengal an chak lo ve ve a, goal difference en tur pawh ni se East Bengal hian an la phak chuang lo.

Hei vang hian East Bengal tan chak ngei ngei a ngai a, Minerva Punjab puihna an mamawh tel bawk tihna a ni.

Mizo channa!
East Bengal-in hrem vangin an chhuanvawr Jobby Justin an chhawr thei dawn lo a, tun season-a goal kua khung tawh striker awm loh hlanin Brandon VL Remdika chu inkhel bul ṭan tura beisei a ni.

East Bengal captain Lalrindika Ralte, "Bul kan ṭan vek ka ring," tiin Mizo tlangvalten inkhel bul an ṭan a beisei thu a sawi a, Lalramchullova leh R. Laldanmawia te pawh kan hmu dawn tihna a ni. Sialhawk Express tia hminglem an pek Danmawia'n tun season-ah goal sarih a khung tawh a, I League-ah Indian player zinga ani aia goal khung hnem awmchhun chu Jobby Justin chiah a ni.

East Bengal-in tun dinhmun an thlen nan Lalramchullova chu player thawhhlawk pawl a ni a, Armed Veng tlangval hi tlarhnungah Kolkata club tan player pawimawh a ni ang.

Captain Fantastic
East Bengal-in tun season-ah club legend Lalrindika Ralte chu captain-ah an hmang a, Lunglei tlangval hian player ṭha bik a nihzia pholangin assist vawi kua a nei tawh.

Didika chuan, "Kan dinhmun a ṭha lo zawk a, hnehna kan chan pawhin Chennai City chak loh kan chan a ngai. Champion tur chuan thil mak a thlen tel a ngai tihna a ni a, kan champion ta hlauh a nih pawhin Pathian vang a ni ang," tiin Vanglaini a hrilh.

East Bengal captain sawi angin Kolkata club hian an tih tur hmasa ber chu hnehna chan phawt a ni a, tlarhmaah goal kua khung tawhtu Enrique Esqueda chu goal khung tura beisei a ni ang.

Didika chuan, "Match hmasa ber aṭangin coach-in min awmpui mah se min zawm tlai avangin a duh ang player a la lo a, bul kan ṭan dan ngaihtuah chuan tun dinhmun hi lawmawm tak a ni," tiin champion lo pawh ni se an lawm thu a sawi.

Chennai ve thung
Chennai City-in Minerva Punjab an mikhual dawn a, tun season-a team pahnih khelh dan en chuan Minerva tan chak beisei harsa tak a ni - hei tak hi East Bengal tana beiseina ti zuaitu a ni.

Akbar Nawas enkawlna hnuaia khel Chennai-in tun season-a an tih fuh bera chhal ngam chu Spanish player panga ngawt an nei hi a ni a, champion an tumna kawngah an thawhhlawk takzet. Tlarhmaah captain Pedro Manzi hian tun season I League-ah goal 20 ngawt a khung tawh a, midfielder Sandro Rodriguez (9 goals) leh Nestor Gordillo (8) ten ball an thiam piahlamah goal khung an thiam tel bawk.

Tlarhnungah goalkeeper Nauzet Santana leh Roberto Eslava chu Chennai tan ban rinawm an ni bawk a, Chennai City hian nomawi an chawi a nih ngat chuan Spanish player-te hi fak tur an ni ang.