LTA-in pound maktaduai 20 a ruahman
Lawn Tennis Association (LTA) chuan tunlai tennis tournament awm lo vanga harsatna tawk thei hrang hrang - inelna neihna hmun, coach, official leh player ranking hniam deuhte tan pawisa a theh chhuak dawn.
Singles player, world ranking lama 100-na hnuai lam - dan kal lai anga thuneitu lam aṭanga pawisa dawng ve phak lote chu ṭanpuina hi pek an ni dawn. LTA chief executive Scott Lloyd bakah hna thawktu dang te chuan an hlawh 20% an lak kim loh tur thu an sawi tawh bawk.
England ram chhunga tennis tuneitu sang LTA hian hetiang ruahmanna an siam chhan hi Wimbledon bakah grass court season an hman dawn loh vang a ni, coronavirus vangin tennis inelna hi July 13 thleng an chawl lailawk a ni.
Lloyd chuan, "Tennis hi hun lo la awm leh zel turah tun hma aia ropui zawka khelh kan duh, chumi atan chuan tunah hian kan tih theih hrang hrang kan tih a ngai. Hun harsa sukiang tur hian ṭanrual a pawimawh.
"Inelna thlengtu lamin harsatna an tawk dawn a, chutih rualin hnathawk mi tam tak a nghawng bawk. Duhthusam leh a ṭha ber in pe thei lo mah ila mamawh zualpui phuhru tur tala chet a ngai," tiin a sawi.
Grass court season chhunga inelna lian ber Wimbledon hi indopui pahnihna hnua a vawi khat nan ṭhulh a ni a, champion lai Novak Djokovic leh Simona Halep te chuan an title kawl lai an hum tlang rih ang.