NBA a che chhuak
Covid-19 do nan NBA chuan a theih tawp a chhuah zel, basketball inelna sang ber hian a hnuaia club New York Knicks leh Brooklyn Nets te bakah China consul general Huang Ping kaltlangin 'surgical mask' maktaduai khat an thawh.
United States-ah chuan New York khawpui chu coronavirus darh nasatna hmun a ni. NBA chuan Knicks, Nets leh Huang te kaltlang hian New York hmuna hna thawktute chu a ṭanpui a ni.
New York governor Andrew Cuom chuan, "New York khawpuia damdawi lam thiam hnathawk ten an mamawh tak mai surgical mask chu maktaduai khat zet mai pe an ni," tiin Twitter lamah a tarlang a, anmahni petu - NBA, Knicks, Nets leh Huang Ping te a thailang bawk.
NBA season hi tiam chin awm loin an chawl mek a, engtik hunah nge an khelh chhunzawm leh theih ang tih hriat a ni lo. Khawvel ram zingah US hi hri leng kai an tam berna hmun a ni mek a ni.
United States president Donald Trump chuan, "Beisei aia hmain kan ṭan leh thei mai thei," tiin an rama infiamna an chawlh lailawk ho chungchang a sawi a, khelh leh thuai an beisei.