Real lakah Liverpool an 'comeback' thei dawn em?

Liverpool chuan zanin dar 12:30-ah Champions League quarterfinal second leg khel turin Real Madrid an mikhual dawn a, English club dinhmun a duhawm lo hle.

Madrid khawpuia first leg-ah Liverpool hian 3-1 in Real an lo ngam lo tawh a, Champions League-a a thiam pali zinga tel tur chuan zaninah si hnih fai tala an chak a ngai dawn tihna a ni. Liverpool-in tun season-ah Premier League nomawi an humhim thei tawh lo a, Champions League hi an beisei neihchhun a ni tawh - kut ruaka season khar an duh loh chuan zaninah goal hnih an khung a ngai dawn.

Liverpool leh 'comeback' hi thil sawi kawp rem ber pawl a ni tih chu AC Milan (2005 final) leh Barcelona (2019 semifinal)-te a hrechiangtu an ni a, Anfield-ah inkhel a hmuhnawm loh ring suh.

Min hrilh leh rawh
Liverpool-in zaninah infuihphur nan thawnthu hlui an inhrilh leh ang a, football-ah thil thleng thei lo a awm lo tih chu zanin an thupui ber tur a ni ang.

Reds hian 2018-19 Champions League semifinal first leg-ah khan Barcelona chu 3-0 in an ngam lo a, second leg-ah 4-0 a hnehna chang chungin comeback ropui an lantir thung - he thawnthu hi an tan a mawi thar leh ang.

Barca laka comeback ropui lantirtu zinga player tam zawk chu Liverpool tan an la khel a, kha inkhel ai mah khan Real laka comeback hi an goal khung dan nena ngaihtuahin a harsa lo zawk. Mahse, 2019 angin au phurtu fans an awm dawn lo thung.

Liverpool boss Jurgen Klopp chuan, "Infuihphur kan mamawh a nih chuan Barcelona laka kan game kha kan en thei ang. Mahse, kha inkhelah kha chuan 80% kan game kha mipui puihna vang a ni a, tunah chuan mipui tel loin kan tih a ngai dawn," a ti a, a hautak dawn tih a hai lo.

A 'hot' dawn
Real Madrid-in an stadium hmingthang Santiago Bernabeu an sak ṭhat mek avangin training ground Alfredo di Stefano stadium an hmang rih a, first leg an inkhelh zawhah Klopp chuan ngeiawm takin hei hi a sawisel.

German coach chuan, "Zanin kan inkhel kha sawithiam a harsa a, stadium zawng zawng nen khan khelh a harsa a ni. Anfield erawh stadium pangngai tak a ni a, chu chu kan tan a ṭha a ni," a ti deuh kher! Zinedine Zidane chuan Klopp hi chhang nghalin, "Hei hi kan stadium chu a ni a, he hmuna kan inkhel thei hi kan inchhuang hle a ni," a ti thung - coach pahnih vang ringawt pawhin zanin inkhel hi a hmuhnawm dawn.

French coach hian second leg thlirlawkin, "Liverpool hian an theihna zawng zawng nen min lo hmachhawn dawn tih ka chiang a, kan inpeih a ngai a ni. Second leg hmuhnawm tak a nih ka ring a, first leg ang thoa kan khelh a ṭul ang," a ti.

Thutlukna
Zanina chak tura Klopp-a tana pawimawh ber chu thutlukna siam sual loh a ni. Madrid khawpuiah Thiago Alcantara aiah Naby Keita chu bul a ṭantir a, a tihsual a hriatchhuah meuh chuan 2-0 a ni tawh.

Real hi Casemiro, Toni Kroos leh Luka Modric neitu an nih avangin midfield-ah chuan an hmuhnawm leh dawn tih a chiang a, anni pathum dawl zo tur chuan Klopp tan Thiago leh Fabinho khelh duntir a fuh ang. Liverpool-in Virgil van Dijk, Jordan Henderson, Joe Gomez leh Joel Matip-te inhliam an tuar tih hi sawi nawn a ngai leh ṭhin a, a bik takin VVD leh Hendo an awm loh chuan hruaitu ṭha an nei lo.

Heng zawng zawng thlir hian Klopp-a tan Georginio Wijnaldum aia hruaitu ṭha James Milner hi hman a châkawmin a rinawm a, Real midfield dang hneh tura Liverpool inrem dan tur hi hmuh a châkawm hle.

Tlarhma hi
Liverpool-in an league match hnuhnung berah Aston Villa chu 2-1 in an hneh 'hram' a, Reds tan Mohamed Salah leh Trent Alexander-Arnold-ten goal khat ve ve an khung.

Klopp tan manganthlak khawpin Roberto Firmino leh Sadio Mane an 'form' lo a, season hmasa lawka European football-a tlarhma hmuhnawm ber pawl hian goal khung an harsat tlat - zaninah goal hnih khung an mamawh! Salah erawh a rintlak reng a, mahse, Egyptian forward hian tun season match 43-a khelhah goal 28 khungin assist vawi li a nei tawh a, amah chauha rin chi erawh a ni bik lo - Firmino leh Mane-ten an hna an thawh ve a ngai.

Chutihrual chuan Klopp-a'n Mane emaw Firmino emaw a pakhat zawk zawk hi bench-ah a dah mai thei a, chuti a nih chuan Diogo Jota tan hmun a awm dawn tihna a ni a, Portuguese forward tan tun hi hming chher hun a ni.

Real thlirna
Madrid-in inhliam vangin captain Sergio Ramos an la chhawr thei dawn lo a, Covid-19 vangin Raphael Varane a la inlan thei dawn lo bawk - Liverpool tan chanchin lawmawm a ni.

Chutihrual chuan defender pahnih hi first leg-ah pawh an awm lo tawh a, an aiawhtu Nacho leh Eder Militao-ten Liverpool dang chat turin an hna an thawk ṭha hle. Mipui awm lohna Anfield-ah an zam thut lo ang.

Eden Hazard chu hliam vangin Liverpool-a zin tur zingah a tel lo a, ani hi awm lo pawh ni se Karim Benzema a awm miau avangin manganna tur erawh a awm lo - French striker hian tun season-ah match 35 khelin goal 25-a khung tawh a, assist vawi ruk a nei bawk.

Hriat tel tur chu Real hi El Clasico-a Barcelona hneh hlim an ni a, an phur vanglai tak a ni - Ramos leh Varane tel loin Liverpool leh Barca-a zawnin an hneh thei a, zakinah chak an inring a nih pawhin an demawm loh.