De Bruyne-a'n champion vek a duh
Manchester City chu nomawi pali chawi thei dinhmunah an ding mek a, an player pawimawh Kevin De Bruyne chuan nomawi chawi theih awm zawng zawng chawi vek a duh thu a sawi chhuak.
Zanin dar 12:30 hian Pep Guardiola naute hian Champions League quarterfinal second leg khel turin Borussia Dortmund an tlawh dawn, an intawn hmasakin Man City hian 2-1 in hnehna an chang a, tlang turin an dinhmun a ṭha hreta ngaih a ni.
Thil tum pangngai
Spanish manager Guardiola-a'n Etihad Stadium-ah season ngana a hmang mek a, league leh inelna tenau zawkah hlawhtlinna chang tawh mah se UCL-ah chuan quarterfinal pawh an la pel ngai lo, kuminah hian sulhnu ṭha zawk hnutchhiah an tum.
City tana season li daih contract ziak thartu De Bruyne chuan, "Kum a hran, mahse thil tum chu a pangngai," tiin Champions League nomawi chawi chu an thil tum lian leh pawimawh a la nih reng thu a sawi, nomawi dang zawng aiin chawi an chak ngeiin a rinawm bawk.
Guardiola naute hian beisei awm takin khel mah se a hmawr bawk fuh loh chang an nei ṭhin, 2018 leh 2019 ngei pawh khan English club dang Liverpool leh Tottenham Hotspur an ngam lo, kuminah chuan German club lakah chetsual loh an tum ang.
Chetsual theih
Manchester City hi an khelmual Etihad Stadium-ah ngei mualpho hlim an ni, player 10-a khel Leeds United lakah 2-1 in an tlawm. Team ṭha tak ni mah se an famkim bik lo tih a chiang a, chuvangin Dortmund lakah fimkhur a ngai dawn.
Leeds an hneh loh ṭum hian Pep-a'n De Bruyne, Riyad Mahrez, Phil Foden, Rodri, Ruben Diaz leh Kyle Walker te chu hahchawlhna hun a pe vek a, anni hian zaninah inkhel bul an ṭan a rinawm a, tha za zek zawkin an inlan thei dawn tihna a ni.
Belgium international KDB chuan, "UCL champion nih chu player zawng zawng duh a ni, keini pawhin kan duh. Chumi ti thei tur chuan City hi kan ṭha tawk," tiin a inringtawk hle. UCL title la turin an ṭha tawk em, tih chu a hriat mai dawn.
Dortmund beiseina
Etihad Stadium a an intawn ṭum khan hun tawp dawna Foden goal hmangin Man City an chak hram a, rawlthar Jude Bellingham goal khung kha pawm ni se la chuan inkhel result a danglam mai thei bawk. City hi 2-1 in chungnung mah se an dinhmun hi a la him lo.
Dortmund tan semifinal lut turin 1-0 a hnehna lo chan a tawk mai, striker ṭhami Erling Braut Haaland kawltu team tan mahni muala goal khat khung hi thil huphurhawm tak a nih a rinawm lem lo. Jadon Sancho awm lo tur erawh an ṭhat dan berin an khel thei dawn bik lo tihna a ni.
Bundesliga club tan tlang tur chuan Haaland a pawimawh dawn, tun season UCL-a goal 10 khung tawh hian first leg-ah khan goal khung lo mah se Marco Reus tan a siamsak a, zanin hian striker puitling a ni tawh em, tih chu fiah a ni ang.