Big Sam-a kaihhruai West Brom-in Saints an hneh

Thawhṭanni zan Premier League inkhelah tla thei dinhmuna ding West Bromwich Albion an inlan a, Sam Allardyce-a hoten Hawthorns-ah Southampton 3-0 in an hneh. Baggies-in point thum hlu tak an hlawhchhuah avangin Premier League khelh beiseina an la chhi nung zel.

West Brom hian match sarih khelh tur la awmah a him china awm Newcastle United chu point riatin an la pha lo a, season tawp lam relegtion battle a ngaihnawm dawn. Inkhel dangah Brighton & Hove Albion-in Everton an chelh a, 0-0 in an inhnehtawk.

Big Sam-a hote
Season tawp lam a nih tawh chuan table mawng lama awm an hlauhawm ṭhin. Thawhṭanni zan inkhelah pawh Baggies-in thapui an chhuah a, Southampton lakah an chungnung zawk a, goal chance pawh an nei hmasa zawk. Darnell Furlong-a volley chu Mbaye Diagne-a'n goal-ah a chantirah a ngai a, mahse offside vangin pawm a ni lo.

Saints lamin Stuart Armstrong hmangin goalkeeper hna rawn pe ve mah se Baggies zawkin goal an khung. Southampton keeper Fraser Forster-a'n a fimkhur tawk loh vangin Matheus Pareira a ti tlu a, penalty a chawi.

Pareira hian a penalty hlawhchhuh hi minute 32-naah goal-ah a chantir. West Brom hian minute thum hnuah an khung lehnghal a, Mbaye Diagne thawhrah sengin Matt Phillips-a'n a tlawh lut.

Second half-ah West Brom bawk an che ṭha a, Saints tlarhnung pawp chu Callum Robinson-a'n remchangah lain minute 69-naah Baggies goal thumna a khung. Goal thum luh hnuah Saints ben harhin an awm ve chauh a, mikhual team goal bawh a na ta deuh.

Che Adams-a'n goal ban hrulah a pet out a, injury time-ah subsitute Moussa Djenepo-a'n penalty a hlawh chhuak. James Ward-Prowse-a'n penaty hi petin West Brom keeper Sam Johnstone-a'n a dansak.

Sawisel hlawh VAR
Thutlukna dik siam turin sum tam tak sengin VAR hman a ni a, amaherawhchu VAR hian inhnialna a ti tam. Tunkar Premier League inkhelah phei chuan VAR hian sawisel hlawh takin thutlukna pali a siam.

Wolverhampton Wanderers leh Fulham inkhelh ṭumin VAR-in Wolves midfielder Daniel Podence chu offside-ah a ngai a, hemi a nih avang hian Willian Jose a ball tauh luh chu pawmsak a ni lo.

Replay ennawn hnuah pawh Podence hi a offside chiah em tih chu inhnialna awm thei tak a ni. Liverpool leh Aston Villa inkhelh ṭumin Roberto Firmino goal khung chu Diogo Jota offiside vangin pawm a ni lo a, amaherawhchu replay-ah erawh Portuguese forward hi a offside niin a lang lo.

Manchester United leh Tottenham Hotspur inkhelh ṭumin Edinson Cavani-a goal khung chu Scott McTominay-a'n Son Heung-min-a hmai a khawih palh avangin pawm a ni lo. South Korean forward Son-a tluk uar avangin goal hi pawm loah a ngaih theih a, chutihrualin tlu uar ta reng pawh ni se VAR hian thil thlen dan a hmu sualah a ngaih theih tho.

West Brom leh Saints inkhelah VAR a chesual leh a, offside vanga Mbaye Diagne goal an pawm loh chu goal-a pawm tur zawk a ni. Goal khungtu Diagne a offside lo a, replay aṭanga offside nia lang Kyle Bartley chuan ball a khawih loh bakah keeper a tih buai loh avangin goal-a pawm ngei tur a ni.

Big Sam chuan, "Kan goal khung hmasa an pawm loh dan kha a zia lo lam hret a ni. Replay aṭanga ka ennawn khan ka naute khan tihsual an nei lo. Kan lawmna lai erawh kha thil thleng khan result a nghawng lo a, kan vannei hlein ka hria," tiin VAR thutlukna a dik loh thu a sawi.

Eng nge an sawi?
Southampton boss Ralph Hasenhuttl chuan, "First half-ah khan kan khel ṭha tawk lo a, West Brom kha kan elpha lo a ni ber. Second half ṭantirh minute 25 chhung kha kan khelh ṭhat lai ber a ni a, mahse point hmuh nan a tawk lo. Hlawhtlin kan duh a nih chuan tun aia kan huaisen kha a ṭul a ni," tiin a sawi.

West Brom manager Sam Allardyce chuan, "First half bikah khan kan khel ṭha em em a, 2-0 aia tam khung thei tur kan ni. Ka naute hnenah khan Saints an inthlak danglam tur thu ka hrilh a, second half-ah khan rin angin an rawn insiamṭha. Chutihrualin hun rei tak chhung kan tlarhnung hi a phui ṭha tawh a, goal kan venhim zarah harsatna nei loin hnehna kan chang," tiin a sawi.