Olympic football atan kum 24 chin
Football thuneitu sang FIFA chuan Tokyo Olympic 2020 neih hun sawn a nih avangin a dan leh hrai ṭhenkhat a ennawn a ngai. Olympic football khel thei chin kum 23 ni ṭhin chu nakkum atan kum 24 chinah tih a ni dawn.
FIFA chuan dan siamṭhat rawtna hi a pawm thawh a, mahse pangngai taka tlang tur erawh chuan FIFA Bureau lamin an pawmpui a la ngai - tuna an ruahman dan ang hi a tlang ngei tura ngaih a ni.
Coronavirus vangin kumin nipui laia neih tur Tokyo Olympic chu nakkum atan sawn a ni a, infiamna khawmpui lian hi July 23-ah neih ṭan tur niin, a neih ṭan ni hian football pawh ṭan nghal a ni ang.
Dan tharah chuan Tokyo Olympic-ah hian kum 1997 January 1 a piang chin an inlan thei dawn tihna a ni, tun hma chuan kum 23 chin inelna a ni ṭhin, kuminah erawh kumina khel turte kha nakkuma an inkhelh a ngaih avangin tih danglam a ngai.
Ram tinin kum 24 player an chhawr dawn tihna a ni a, player upa - kum 24 chunglam chhawr theih zat erawh a kalphung pangngai angin pathum a ni chhunzawm ang. Hmeichhe inelna lamah chuan kum bithliah a awm dawn lo thung.
Tun dinhmunah chuan FIFA hian a hnuaia ram leh ram inelna zawng zawng chu June thla thleng a chawlh lailawk tir vek a, hri leng dinhmun a zirin hei pawh hi pawhsei leh theih a ni.