Premier League aṭangin tu nge relegate dawn?
Premier League aṭangin team pathum an relegate dawn a, pakhat chu a chiang tawhah a ngaih theih. Table mawngphaha awm Sheffield United chu relegate ngei turah a ngaih theih a, club dang pahnih erawh a la chiang lo.
English football inelna sang bera inhamtang tur hian point 40 hmuh a ngai an ti ṭhin a, chutia nih chuan match sarih khelh tur la awma point 36 hmu tawh Southampton leh a chunglam hi chu an him mai turah a ngaih theih. Table-a 15-naa awm Brighton & Hove Albion leh an hnuaia awm te hi a him loah a ngaih theih a, season tawp lam a boruak dawn.
Everton chelhtu
Amex Stadium-ah Brighton & Hove Albion-in Everton an chelh a, point khat an hlawhchhuah avangin point 33 an hmu tawh. Point 40 hi a him chin tehfung atana kan hmang a nih chuan Brighton hian match sarih khelh tur la awmah point sarih an hmuh a la ngai a, awlsam tak chu a ni dawn lo.
Brighton fixtures thlirin Sheffield United chu point thum hmuhna turah a ngaih theih a; Leeds United, Wolves, West Ham leh Arsenal te lakah erawh point thum huh a har dawn. Seagulls hian Chelsea leh Man City te an la hmachhawn dawn bawk avangin point sarih hmuh hi hna harsa a tling ang.
Burnley ve thung
Burnley-in table mawngphaha awm Sheffield United an la hmachhawn dawn a, chu ai maha pawimawh tur chu 18-naa awm Fulham nen an inkhel tur hi a ni ang. Clarets hian Champions League khelh tum Manchester United, Liverpool leh West Ham te an la hmachhawn dawn a, club vantlang Wolves leh Leeds United lakah point hmuh ngei a ṭul dawn a ni.
Newcastle dinhmun hi
Premier League club hlun ber zinga mi Newcastle United dinhmun a ṭha lo a, Steve Bruce-a hote hi relegation zone-a awm Fulham nen point ruk chauhin an inthlau a, goal difference-ah inchhuanna tur an neih loh bawk avangin chesual thei an ni.
Newcastle hian club ṭha West Ham, Liverpool, Arsenal, Leicester City leh Manchester City te an tum chhoh dawn avangin season tawp lamah meuh chuan tun ai hian a dinhmun hi a la derthawng turah a ngaih theih.
Amaherawhchu an khelh hma bakah Sheffield United leh Fulham te an la awm. League match hnuhnung bera Fulham leh Newcastle inkhel tur hi Premier League khel tur zawnna 'Playoff Final' ang hialah a chhuak thei ang.
Beisei nei Fulham
Fulham hi match khatin an khel tam a, match ruk chauh khelh tur an neih tawh avangin Premier League khel zel tur chuan thi leh thau pawlh a, an ṭan a ṭul tawh takzet. Cottagers hian London club Arsenal leh Chelsea te an hmachhawn dawn a, club vantlang Burnley leh Southampton te nen an inkhelh dawn bawk avangin Newcastle lakah pressure nasa zawk an pek theih ngei a rinawm.
Fulham vanneihna erawh Old Trafford-a an len luh hunah Ole Gunnar Solskjaer-a hoten dinhmun an sawhnghet thei tawh a, Manchester United nem zawk hmachhawn thei dinhmunah an ding. Season kharna inkhela Newcastle United nena inkhel tur mawlh hi hmuhnawm tura ngaih chu a ni a, chutihrualin an khelh chhoh dan a zirin inkhel hian a nghawng a nei lo thei bawk.
Big Sam-a hote hi
West Brom-in Southampton an hneh avangin Premier League khelh beiseina thar an nei a, amaherawhchu uluk taka table zirchian chuan thilmak a ngai tawh tih erawh thil chiang a ni.
Chutihrualin Baggies hian thilmak thlentir ṭhintu Sam Allardyce an kawl a, beisei an la nei ve zel. West Brom hian Leicester, Aston Villa, Wolves, Arsenal, Liverpool, West Ham leh Leeds United an la hmachhawn dawn a, Premier League khelh zel an tum a nih chuan point 21 hmuh theih aṭangin point 15 hmuh a ṭul.
Chumi awmzia chu Baggies hi vawi hnih an chak lo a nih chuan vawi nga dangah an chak vek a ngai tihna a ni a, an fixtures thlirin chak lona tur match thum tal a la awm avangin Big Sam-a hote hi an tlak tho a rinawm zawk.
