Khaled Memorial champion Legends

Nimin khan Legends chuan Hunthar lakah run riat chauha hnehna changin Khaled Memorial 2nd Division Screening Tournament nomawi an chawi, season tharah chuan finalist team pahnih hi 1st division club an ni tawh ang.

Durtlang Khelmuala final inkhelah Hunthar hi ṭum vawrah vannei zawkin vawm hmasak an thlang. League round lama an intawn ṭumin Hunthar hian vaw hmasa in run 79 chauh an siam a, an chak lo zui. Tun ṭuma vawm hmasak an thlang hi a mak hran lo.

F. Malsawmtluanga, Vanneihtluanga, Moses Ramhlunmawia leh Maran Kalai ten wicket hnih ṭheuh lain Legends hi over 32.1 lekah run 124 siam tirin an vawm hlum vek a, player malah run 20 siam tling an awm lo hial.

Hunthar lam tan target sang tak a ni hran lo. Mahse, captain Lalrinmawia Kawlni leh Moses Ramhlunmawia te inkawp fuh chu Pradeep Kumar-a'n a vawm hlum a, Player of The Match atan thlan Mukesh Kumar Ram chuan wicket thum la bawkin over 31.2-ah run 116/10 siamin an thi khim.

League round bikah pawh Legends hi a chungnung ber an ni a, inelna hmawr bawk nana nomawi an chawi hi an phu. A vawi khat nana final kheltu Hunthar pawh chak lo mah se season tharah inelna sang an hmachhawn dawn avangin lawmna tur an nei tho.

Second division a che ṭha pahnih an kaisan rual hian, a hniam lama awm Tlangnuam leh Saron erawh an tlahniam thung. Suaka Cricket Ground, Sinhmui lamah Mahuma Memorial 1st Division Screening Tournament pawh khelh mek zel a ni a, nimin khan Gorkha chuan Zarkawt Lords lakah run 16-in hnehna an chang.

Vawiin hian a hmun ngaiah inkhel a awm leh dawn a, champion beisei ngam zinga mi Chhinga Veng leh Durtlang an inhmachhawn dawn a ni.