Warriors tana point nei hnem ber Curry

Stephen Curry chu Golden State Warriors tana point nei hnem ber a ni ta. American guard hian nimin zing khan point 53 zet nei chungin a team hi Denver Nuggets lakah 116-107 in hnehna a chanpui.

Curry hian 2009 aṭang khan Golden State tan hian a khel ṭan, nimin thleng khan point 17,818 a neihsak tawh a, tun hma lama point nei hnem record lo chelhtu Wilt Chamberlain (17,783 points) chu a khum.

NBA Most Valuable Player vawi hnih ni tawh Curry hi cheṭha mah se duhthusamin season an hmang ṭha lo. Western Conference-ah 10-na dinhmun an luah mek a, playoff khel tur chuan hmasawn an la mamawh.

Inkhel dangah Bradley Beal-a point 34 leh Russell Westbrook triple double hmangin Washington Wizards chuan Utah Jazz lakah 125-121 in hnehna an chang, a zawna match 24 chak tawh Jazz kaltluang lai chu an titawp.

Chak lo mah se Jazz hi Western Conference hmahruaitu an la ni chhunzawm. Eastern Conference lamah Philadelphia 76ers chuan 113-95 in Dallas Mavericks an hneh a, hnehna an chan theih nan hian point 36 neitu Joel Embid a thawh hlawk hle.

Los Angeles Lakers an che fuh hleithei lo, NBA champion hi New York Knicks lakah 111-96 in an tlawm a, tun hnai an match hnuhnung 13 aṭangin ṭum nga chiah chak ni hmel an hmu. Julius Randle chuan a club hlui Lakers lakah point 34 leh rebound 10 lain Knicks a chakpui.